ഇഫ്‌കോ-ടോക്കിയോ ഷുവര്‍ട്ടി ബോണ്ടുകള്‍ പുറത്തിറക്കി
പ്രമുഖസഹകരണസ്ഥാപനമായ ഇന്ത്യന്‍ ഫാര്‍മേഴ്‌സ്‌ ഫെര്‍ടിലൈസര്‍ കോഓപ്പറേറ്റീവ്‌ ലിമിറ്റഡും (ഇഫ്‌കോ) ജപ്പാനിലെ ടോക്കിയോ മറൈന്‍ ഗ്രൂപ്പും തമ്മിലുള്ള സംയുക്തസംരംഭമായ ഇഫ്‌കോ-ടോകിയോ ജനറല്‍ ഇന്‍ഷുറന്‍സ്‌ ഷുവര്‍ട്ടി ബോണ്ടുകള്‍ പുറത്തിറക്കി. ഇന്ത്യയിലെ അടിസ്ഥാനസൗകര്യവികസനത്തെ സഹായിക്കുകയാണ്‌ ഉദ്ദേശ്യം. നിയമപരമായി നടപ്പിലാക്കിയെടുക്കാവുന്ന ഈ ഉടമ്പടികള്‍ വികസനപദ്ധതികള്‍ക്കു പരമ്പരാഗത ബാങ്ക് ഗ്യാരന്റികള്‍ക്കു പകരമായി റിസ്‌ക്‌ കുറയ്‌ക്കാന്‍ ഉപയോഗിക്കാവുന്നവയാണ്‌. വികസനപദ്ധതികള്‍ കരാര്‍ എടുത്തു നടപ്പാക്കുന്നവരിലേക്കു കൂടുതലായി കടന്നുചെല്ലാന്‍ ഇഫ്‌കോ-ടോക്കിയോക്ക്‌ ഇതുമൂലം കഴിയുമെന്നാണു പ്രതീക്ഷ. നിര്‍മാണമേഖലയില്‍ ഇതുവരെ 1.7 ട്രില്യണ്‍ ബാങ്ക്‌ഗ്യാരന്റികള്‍ നല്‍കിക്കഴിഞ്ഞിട്ടുണ്ട്‌. 2020-ഓടെ ഇതു മൂന്നുട്രില്യണ്‍ ആകുമെന്നാണു കണക്കുകൂട്ടല്‍. കരാറെടുത്തയാള്‍ കരാര്‍ പ്രകാരം ചെയ്യേണ്ടകാര്യങ്ങള്‍ ചെയ്യുമെന്നും അതില്‍ വീഴ്‌ചവന്നാല്‍ ബോണ്ട്‌ എടുത്തയാള്‍ക്കു ഒരു സാമ്പത്തികനഷ്ടപരിഹാരം നല്‍കുമെന്നുമുള്ള ഉറപ്പാണു ഷുവര്‍ട്ടി ബോണ്ട്‌.
