സഹകരണ ഭേദഗതി ബില്‍ പാസായി;മലപ്പുറം ജില്ലാ ബാങ്കിനെ കേരള ബാങ്കില്‍ ലയിപ്പിക്കും
മലപ്പുറം ജില്ലാ സഹകരണ ബാങ്കിനെ കേരള ബാങ്കില്‍ നിര്‍ബന്ധമായി ലയിപ്പിക്കുന്ന സഹകരണ ഭേദഗതി ബില്‍ നിയമസഭ പാസാക്കി. പ്രതിപക്ഷം വിയോജിപ്പ് അവതരിപ്പിച്ചെങ്കിലും ഐകകണ്ഠ്യേനയാണ് ബില്‍ പാസായത്. ബില്‍ പാസാക്കുന്ന ഘട്ടത്തില്‍ ആരും വിയോജിപ്പ് അറിയിച്ചിരുന്നില്ല. നടപടിക്രമങ്ങള്‍ പാസാക്കി സഹകരണ സംഘം രജിസ്ട്രാര്‍ ഉത്തരവിറക്കുന്നതോടെ മലപ്പുറം ജില്ലാ ബാങ്കും അതിന്റെ ആസ്തി ബാധ്യതകളും കേരള ബാങ്കിന്റെ ഭാഗമാകും.
കേരള ബാങ്കിലൂടെ 13 ജില്ലകളിലെ സഹകാരികള്‍ക്കും ലഭിക്കുന്ന പലിശ ആനുകൂല്യവും ഇളവുകളും മലപ്പുറം ജില്ലയിലെ സഹകാരികള്‍ക്കും ലഭ്യമാക്കുകയെന്ന ലക്ഷ്യത്തോടെയാണ് മലപ്പുറം ജില്ലാ സഹകരണ ബാങ്ക് കേരള ബാങ്കില്‍ ലയിപ്പിക്കുന്നതിനുള്ള ഭേദഗതി നടപ്പിലാക്കുന്നതെന്ന് സഹകരണ മന്ത്രി വി.എന്‍. വാസവന്‍ പറഞ്ഞു. അത്യാധുനിക ബാങ്കിംഗ് സംവിധാനങ്ങള്‍ അധികച്ചെലവില്ലാതെ മലപ്പുറം ജില്ലാ ബാങ്കിനും ലഭ്യമാകും. ഇപ്പോള്‍ ഐ.ഡി.ബി.ഐ. ബാങ്കില്‍ പണം നിക്ഷേപിച്ചു ലഭ്യമാക്കുന്ന ഈ സൗകര്യം സൗജന്യമായി ലഭിക്കും. നബാര്‍ഡ് നല്‍കുന്ന വായ്പയില്‍ മൂന്ന് തട്ടിലുള്ള പലിശയില്‍ ഒരു തട്ടിലുള്ള പലിശ ഒഴിവാകുന്നതോടെ കാര്യമായ ലാഭം സഹകാരികള്‍ക്കു ലഭിക്കുമെന്നും മന്ത്രി പറഞ്ഞു.
ബാങ്കുകള്‍ക്കും ആധുനിക ബാങ്കിംഗ് സംവിധാനങ്ങള്‍ ലഭ്യമാകും. എല്‍.ഡി.എഫും യു.ഡി.എഫും ഒരു രാഷ്ട്രീയവുമില്ലാത്തവരും ഒത്തൊരുമിച്ച് പ്രവര്‍ത്തിച്ചാണ് സഹകരണ മേഖലയെ വളര്‍ത്തിയത്. ക്രെഡിറ്റ് സംഘങ്ങളുടെ മേഖലയില്‍ ദേശീയ തലത്തിലും ആഗോള തലത്തിലും കേരളം മികച്ച നേട്ടം കൈവരിച്ചിട്ടുണ്ട്. കഷ്ടപ്പാടിന്റെ കാലങ്ങളില്‍ അത് ദുരന്തമായാലും ദുരിതമായാലും ബലിഷ്ഠമായ കരങ്ങളിലാണ് സഹകരണ വകുപ്പ് താങ്ങി നിര്‍ത്തിയിട്ടുള്ളത് – മന്ത്രി പറഞ്ഞു.പഞ്ചാബിലെ കോണ്‍ഗ്രസ് സര്‍ക്കാര്‍ ജില്ലാ ബാങ്കുകളിലെ ലയനത്തിന് കേരളത്തിന്റെ മാതൃകയാണ് സ്വീകരിക്കുന്നത്. അവര്‍ കേരളത്തില്‍ നിന്നു രേഖകളൊക്കെ വാങ്ങിയിരുന്നു. കേരളത്തെ മാതൃകയാക്കാന്‍ ആര്‍.ബി.ഐ. രേഖയിറക്കുന്നത് അഭിമാനിക്കാന്‍ കഴിയുന്നതാണ്. ഹൈക്കോടതി നിയമം നിര്‍മിക്കാന്‍ പാടില്ലെന്ന് നിര്‍ദ്ദേശിച്ചതായുള്ള വാദവും കോടതി വിധി വിശദീകരിച്ചു മന്ത്രി മറികടന്നു. നിലവിലെ സ്ഥിതി തുടരാന്‍ പറയുന്ന വിധിയില്‍ നിയമ നിര്‍മാണം തടസ്സപ്പെടുത്തുന്നില്ലെന്ന് മാത്രമല്ല നിയമം നിര്‍മിക്കാമെന്ന് വ്യക്തമാക്കിയിട്ടുണ്ടെന്നും മന്ത്രി വി.എന്‍. വാസവന്‍ വിശദീകരിച്ചു.
