കേരളബാങ്കിന്റെ വെബ്‌സൈറ്റ്‌ മേല്‍വിലാസത്തില്‍ മാറ്റം

കേരളബാങ്കിന്റെ വെബ്‌സൈറ്റ്‌ മേല്‍വിലാസം www.kerala.bank.in എന്നു മാറ്റി. നേരത്തേ www.keralabank.co.in എന്നായിരുന്നു. ബാങ്കുകള്‍ക്ക്‌ .bank.in എന്ന എക്‌സ്‌ക്ലൂസീവ്‌ ഇന്റര്‍നെറ്റ്‌ ഡൊമെയ്‌ന്‍ പ്രാവര്‍ത്തികമാക്കാന്‍ റിസര്‍വ്‌ ബാങ്ക്‌ തീരുമാനിച്ചിരുന്നു. അതുപ്രകാരമാണു മാറ്റം. ബാങ്കിങ്‌ സാങ്കേതികവിദ്യാവികസന-ഗവേഷണ ഇന്‍സ്റ്റിറ്റിയൂട്ട്‌ (ഐഡിആര്‍ബിടി) വഴിയാണിതു നടപ്പാക്കുന്നത്‌. ഈ ഡൊമെയ്‌നിന്റെ എക്‌സ്‌ക്ലൂസീവ്‌ രജിസ്‌ട്രാറാറായിരിക്കാന്‍ കേന്ദ്ര ഇലക്ട്രോണിക്‌സ്‌-വിവരസാങ്കേതികവിദ്യാമന്ത്രാലയത്തിന്റെ കീഴിലുള്ള ദേശീയഇന്റര്‍നെറ്റ്‌ എക്‌സ്‌ചേഞ്ച്‌ ഓഫ്‌ ഇന്ത്യ (എന്‍ഐഎക്‌സ്‌ഐ) ഐഡിആര്‍ബിടിയെ ചുമതലപ്പെടുത്തിയിട്ടുണ്ട്‌. രജിസ്‌ട്രേഷന്‍ നടപടികള്‍ക്കായി ബാങ്കുകള്‍ [email protected] ലൂടെ ഐഡിആര്‍ബിടിയുമായി ബന്ധപ്പെടണം. അപേക്ഷാനടപടിക്രമങ്ങളുടെയും പുതിയ ഡൊമെയ്‌നിലേക്കു മാറുന്നതിന്റെയും വിശദവിവരങ്ങള്‍ ഐഡിആര്‍ബിടി നല്‍കും. എല്ലാ ബാങ്കുകളും നിലവിലുള്ള ഡൊമെയ്‌നുകള്‍ കഴിയുംവേഗം .bank.in എന്ന ഡൊമെയ്‌നിലേക്കു മാറാനുള്ള നടപടികള്‍ ആരംഭിക്കണമെന്നും ഇതു സംബന്ധിച്ച നടപടികളുടെ പൂര്‍ത്തീകരണം ഒരു കാരണവശാലും ഒക്ടോബര്‍ 31ന്‌ അപ്പുറം പോകരുതെന്നും റിസര്‍വ്‌ ബാങ്ക്‌ നിര്‍ദേശിച്ചിരുന്നു.ഡിജിറ്റല്‍ പേമെന്റുകളിലെ തട്ടിപ്പുകള്‍ തടയാന്‍ ബാങ്കുകള്‍ക്ക്‌ .bank.in എന്ന തനത്‌ ഇന്റര്‍നെറ്റ്‌ ഡൊമെയ്‌ന്‍ ഏര്‍പ്പെടുത്തുമെന്നു ഫെബ്രുവരി ഏഴിനു റിസര്‍വ്‌ ബാങ്ക്‌ അറിയിച്ചിരുന്നു. സൈബര്‍സുരക്ഷ ശക്തമാക്കലും ജനങ്ങള്‍ക്കു ഡിജിറ്റല്‍ബാങ്കിങ്ങിലും പേമെന്റ്‌ രീതികളിലും വിശ്വാസം വര്‍ധിപ്പിക്കലുമാണു ലക്ഷ്യങ്ങള്‍.