ദേശീയ സഹകരണ സര്‍വകലാശാല സ്ഥാപിക്കാനുള്ള ബില്‍ ലോക്‌സഭയില്‍ അവതരിപ്പിച്ചു
മലയാളിയായ സഹകരണകുലപതി ഡോ. വര്‍ഗീസ്‌ കുര്യന്‍ സ്ഥാപിച്ച ആനന്ദ്‌ ഗ്രാമീണമാനേജ്‌മെന്റ്‌ ഇന്‍സ്റ്റിറ്റിയൂട്ട്‌ (ഇര്‍മ) ദേശീയ സഹകരണ സര്‍വകലാശാലയായി ഉയര്‍ത്തുന്നതിനുള്ള ബില്‍ കേന്ദ്രസഹകരണവകുപ്പുസഹമന്ത്രി കൃഷന്‍പാല്‍ ഗുജ്ജാര്‍ ലോക്‌സഭയില്‍ അവതരിപ്പിച്ചു. ഇന്ത്യയുടെ പാല്‍ക്കാരന്‍ എന്നറിയപ്പെടുന്ന കുര്യന്റെ പ്രവര്‍ത്തനങ്ങള്‍ക്കു തുടക്കം കുറിച്ച ഗുജറാത്തിലെ കെയ്‌റാ ജില്ലാ ക്ഷീരോത്‌പാദകസഹകരണയൂണിയന്റെ സ്ഥാപകനായ ത്രിഭുവന്‍ദാസ്‌ പട്ടേലിന്റെ പേരിലാണു സര്‍വകലാശാല. കുര്യനും ത്രിഭുവന്‍ദാസും ഹരിചന്ദ്‌ എം. ദലാലയയുമാണു കൈറാ ക്ഷീരസഹകരണയൂണിയന്റെ ത്രിമൂര്‍ത്തികള്‍.
ഇര്‍മയെ ത്രിഭുവന്‍ സഹകരണസര്‍വകലാശാലയാക്കിക്കൊണ്ടുള്ള ബില്‍ 2024 ഡിസംബര്‍ 20നു കേന്ദ്രസഹകരണമന്ത്രികൂടിയായ ആഭ്യന്തര അമിത്‌ഷാ പാര്‍ലമെന്റില്‍ അവതരിപ്പിക്കേണ്ടതായിരുന്നു. പക്ഷേ, അമിത്‌ഷായുടെ അംബേദ്‌കര്‍പരാമര്‍ശത്തെത്തുടര്‍ന്നുണ്ടായ ബഹളവുംമറ്റുംമൂലം സഭാസമ്മേളനം പിരിഞ്ഞതിനാല്‍ ബില്‍ അവതരിപ്പിക്കാനായില്ല. ഇതെത്തുടര്‍ന്നാണു ബജറ്റ്‌ സമ്മേളനത്തില്‍ ബില്‍ അവതരിപ്പിച്ചത്‌.ഇര്‍മയെ സര്‍വകലാശാലയാക്കി ഉയര്‍ത്തിക്കൊണ്ടും ഇര്‍മയെ ദേശീയപ്രാധാന്യമുള്ള സ്ഥാപനമായി പ്രഖ്യാപിച്ചുകൊണ്ടുമുള്ള വ്യവസ്ഥകളാണു ത്രിഭുവന്‍ സഹകരണസര്‍വകലാശാലാ ബില്ലില്‍ ഉള്ളത്‌. ഇര്‍മ പുതിയ സര്‍വകലാശാലയുടെ പ്രധാനപ്പെട്ട ഒരു പഠനകേന്ദ്രമായിരിക്കും. സാങ്കേതികവിദ്യാഭ്യാസവും മാനേജ്‌മെന്റ്‌ വിദ്യാഭ്യാസവും പകര്‍ന്നു നല്‍കുക, സഹകരണമേഖലയില്‍ പരിശീലനം നല്‍കുക, സഹകരണത്തില്‍ ഗവേഷണവികസനപ്രവര്‍ത്തനങ്ങളെ പ്രോത്സാഹിപ്പിക്കുക, സഹകരണത്തിലൂടെ സമൃദ്ധി എന്ന ലക്ഷ്യം കൈവരിക്കുന്ന വിധത്തില്‍ മികവിന്റെ ആഗോളമാനദണ്ഡങ്ങള്‍ പുലര്‍ത്തുക, സ്ഥാപനങ്ങളുടെതായ വിപുലമായ ശൃംഖലയിലൂടെ രാജ്യത്തെ സഹകരണപ്രസ്ഥാനത്തെ ശക്തിപ്പെടുത്തുക തുടങ്ങിയ കാര്യങ്ങളാണു ബില്ലില്‍ വിഭാവന ചെയ്യുന്നത്‌.
സര്‍വകലാശാലാസ്ഥാപനത്തോടെ അധ്യാപക-അനധ്യാപകജീവനക്കാരായി ധാരാളം തൊഴിലവസരങ്ങള്‍ സൃഷ്ടിക്കപ്പെടുമെന്നു പ്രതീക്ഷിക്കപ്പെടുന്നു. സഹകരണജീവനക്കാരുടെ പരിശീലനസൗകര്യങ്ങള്‍ വിപുലമാവും. അവരെ കൂടുതല്‍ മികച്ചരീതിയില്‍ സ്‌ഥാപനങ്ങള്‍ നടത്തിക്കൊണ്ടുപോകാന്‍ പ്രാപ്‌തരാക്കലും ലക്ഷ്യമാണ്‌.1979ലാണ്‌ ഡോ. വര്‍ഗീസ്‌ കുര്യന്‍ ഗുജറാത്തിലെ ആനന്ദില്‍ ഇര്‍മ സ്ഥാപിച്ചത്‌. സഹകരണസ്ഥാപനങ്ങള്‍ക്കും സര്‍ക്കാരിതരസന്നദ്ധസംഘടനകള്‍ക്കും ഗ്രാമീണമേഖലയിലെ പ്രവര്‍ത്തനത്തില്‍ പ്രൊഫഷണലായി പരിശീലനം സിദ്ധിച്ച മാനേജര്‍മാരെ വേണ്ടത്ര ലഭ്യമാക്കുകയായിരുന്നു ലക്ഷ്യം.നേരത്തെയും സഹകരണവിദ്യാഭ്യാസം പ്രോത്സാഹിപ്പിക്കാന്‍ സര്‍വകലാശാല വേണമെന്ന ആവശ്യം ഉയര്‍ന്നുവന്നിരുന്നു. 2010ല്‍ അസമിലെ ശിവസാഗര്‍ കേന്ദ്രമാക്കി അസം രാജീവ്‌ഗാന്ധി സഹകരണമാനേജ്‌മെന്റ്‌ സര്‍വകലാശാല (അര്‍ഗുകോം) സ്ഥാപിക്കുകയും ചെയ്‌തു. ഇന്ത്യയിലെ ആദ്യ സഹകരണമാനേജ്‌മെന്റ്‌ സര്‍വകലാശാലയാണിത്‌. എങ്കിലും അവിടെ സഹകരണസ്‌പെഷ്യലൈസ്‌ഡ്‌ കോഴ്‌സുകളെക്കാള്‍ എം.ബി.എ, എം.സി.എ, എം.കോം, എല്‍.എല്‍.എം, മാനേജ്‌മെന്റിലും കമ്പ്യൂട്ടര്‍ ആപ്ലിക്കേഷനിലും നിയമത്തിലും പി.എച്ച.്‌ഡി. തുടങ്ങി മറ്റു സര്‍വകലാശാലകളില്‍ ലഭ്യമായ തരം കോഴ്‌സുകള്‍തന്നെയാണു പൊതുവെയുള്ളത്‌.
പുതിയസഹകരണബില്‍ പ്രകാരം ദേശീയസഹകരണസര്‍വകലാശാലയ്‌ക്കുകീഴില്‍ സംസ്ഥാനങ്ങളില്‍ നാലോഅഞ്ചോ അഫിലിയേറ്റഡ്‌ കോളേജുകള്‍ വരാം. സഹകരണസംഘങ്ങള്‍ കുറവുള്ള സംസ്ഥാനങ്ങളിലും ഒന്നോരണ്ടോ സഹകരണകോളേജുകള്‍ സ്ഥാപിക്കപ്പെട്ടേക്കും. സര്‍വകലാശാലയ്‌ക്കു ക്ഷീരം, മല്‍സ്യബന്ധനം, പഞ്ചസാര, ബാങ്കിങ്‌, ഗ്രാമീണവായ്‌പ, ധനകാര്യം, വിപണനം, അക്കൗണ്ടിങ്‌, നിയമം, ഓഡിറ്റ്‌, മള്‍ട്ടിസ്റ്റേറ്റ്‌ സഹകരണസംഘങ്ങള്‍ എന്നീ വിഷയങ്ങളുമായി ബന്ധപ്പെട്ടു സഹകരണവിദ്യാഭ്യാസസ്ഥാപനങ്ങള്‍ സ്ഥാപിക്കാനാവും.ലോക്‌സഭയി്‌ല്‍ പാസ്സാക്കിയശേഷം ബില്‍ രാജ്യസഭയിലേക്കയക്കും. അവിടെയും അംഗീകരിക്കപ്പെട്ടശേഷം രാഷ്ട്രപതിയുടെ അംഗീകാരത്തിന്‌ അയക്കും. സര്‍വകലാശാലയുടെ പ്രവര്‍ത്തനങ്ങള്‍ സംബന്ധിച്ച വാര്‍ഷികറിപ്പോര്‍ട്ട്‌ പ്രസിദ്ധീകരിക്കണമെന്നും കണക്കുകള്‍ കംപ്‌ട്രോളര്‍ ആന്റ്‌ ഓഡിറ്റര്‍ ജനറലായിരിക്കും ഓഡിറ്റ്‌ ചെയ്യുക എന്നും ബില്ലില്‍ ഉണ്ട്‌.
