വട്ടിയൂര്‍ക്കാവ് യുവജന സംഘംമീഡിയ,കണ്‍സ്ട്രക്ഷന്‍രംഗങ്ങളിലേക്ക്

moonamvazhi

– ദീപ്തി വിപിന്‍ലാല്‍

വട്ടിയൂര്‍ക്കാവ് നിയോജക മണ്ഡലത്തിലെ വികസന പ്രവര്‍ത്തനങ്ങളില്‍ യുവാക്കളുടെ
പങ്കാളിത്തം ഉറപ്പാക്കുകയും യുവാക്കളിലെ സംരംഭകത്വ ശീലങ്ങള്‍ പരിപോഷിപ്പിച്ച്
അവരെ മികച്ച സംരംഭകരാക്കുകയും ചെയ്യുക എന്നതാണു വൈബ് സഹകരണ
സംഘം ലക്ഷ്യമിടുന്നത്. ആരോഗ്യം, ഉല്‍പ്പന്നങ്ങള്‍, മാലിന്യ നിര്‍മാര്‍ജനം, ഐ.ടി.
മേഖലകളില്‍ പ്രവര്‍ത്തിക്കുന്ന സംഘം കൂടുതല്‍ രംഗങ്ങളിലേക്കു കടക്കുകയാണ്.

 

വ്യത്യസ്തത തേടിയാണു സഹകരണ മേഖലയിലേക്കുള്ള യുവതലമുറയുടെ കടന്നുവരവ് എന്ന കാര്യം ഒന്നുകൂടി ഊട്ടിയുറപ്പിക്കുകയാണു വട്ടിയൂര്‍ക്കാവ് യൂത്ത് ബ്രിഗേഡ് എന്റര്‍പ്രണേഴ്സ് കോ-ഓപ്പറേറ്റീവ് സൊസൈറ്റി. സംസ്ഥാന സര്‍ക്കാരിന്റെ നയപ്രഖ്യാപനത്തില്‍ ഉള്‍പ്പെട്ട നൂറുദിന കര്‍മപരിപാടിയുടെ ഭാഗമായി ആരംഭിച്ച 25 യുവ സംരംഭക സഹകരണ സംഘങ്ങളില്‍പ്പെട്ടതാണു തിരുവനന്തപുരം വട്ടിയൂര്‍ക്കാവ് യൂത്ത് ബ്രിഗേഡ് എന്റര്‍പ്രണേഴ്സ് സഹകരണ സംഘം ക്ലിപ്തം നം. ടി. 2283 ( വൈബ് – ഢഥആഋ ). വട്ടിയൂര്‍ക്കാവ് മണ്ഡലത്തിലെ വികസന പ്രവര്‍ത്തനങ്ങളില്‍ യുവാക്കളുടെ പങ്കാളിത്തം ഉറപ്പുവരുത്തുകയും യുവാക്കളിലെ സംരംഭകത്വ ശീലങ്ങള്‍ പരിപോഷിപ്പിച്ച് അവരെ മികച്ച സംരംഭകരാക്കുകയും ചെയ്യുക എന്നതാണ് ഈ സൊസൈറ്റിയിലൂടെ ലക്ഷ്യമിടുന്നത്. മണ്ഡലത്തിലെ ജനങ്ങള്‍ക്കു ഗുണമേന്മയുള്ള ഉല്‍പ്പന്നങ്ങളും സേവനങ്ങളും കുറഞ്ഞ വിലയില്‍ ലഭ്യമാക്കുന്ന തരത്തിലുള്ള സംരംഭങ്ങള്‍ക്കാണ് സൊസൈറ്റി മുന്‍ഗണന നല്‍കുന്നത്. വിവിധ മേഖലകളിലെ പ്രവര്‍ത്തനങ്ങള്‍ക്കായി പ്രത്യേകം പ്രോജക്ടുകളും അവയുടെ നടത്തിപ്പിലേക്കായി അതതു മേഖലകളില്‍ പ്രാവീണ്യമുള്ള വിദഗ്ധരുടെ ഗ്രൂപ്പുകളും സൊസൈറ്റിയുടെ കീഴില്‍ പ്രവര്‍ത്തിക്കുന്നു. തിരുവനന്തപുരം കോര്‍പ്പറേഷനാണു പ്രവര്‍ത്തനപരിധി.

വൈബ്
ഹെല്‍ത്ത്

നിലവില്‍ വൈബ് ഹെല്‍ത്തിന്റെ കീഴില്‍ ആറു ഡോക്ടര്‍മാരും മൂന്നു നേഴ്സുമാരും ഓണ്‍ കോളായും രണ്ടു നേഴ്സുമാരും ഒരു പി.ആര്‍.ഒ.യും ഫുള്‍ ടൈമായും സേവനമനുഷ്ഠിച്ചുവരുന്നു. മികച്ചതും ഗുണനിലവാരമുള്ളതുമായ ആശുപത്രി സേവനങ്ങള്‍ കുറഞ്ഞ ചെലവില്‍ വീടുകളില്‍ എത്തിക്കുക എന്നതാണു വൈബ് ഹെല്‍ത്തിന്റെ ലക്ഷ്യം. ഡോക്ടര്‍, നേഴ്സ്, ലാബ് ടെക്നീഷ്യന്‍ മുതലായവരുടെ സേവനം വീടുകളില്‍ ലഭ്യമാക്കിവരുന്നു. ഇതിനു പുറമെ സ്പെഷലിസ്റ്റ് ഡോക്ടര്‍മാരുടെ സേവനവും നല്‍കുന്നു. സേവനങ്ങള്‍ ഫോണ്‍ മുഖാന്തിരം ബുക്ക് ചെയ്യാനുള്ള സൌകര്യവും ഓണ്‍ലൈന്‍ പേയ്മെന്റ് സൌകര്യവും ഒരുക്കിയിട്ടുണ്ട്.

വൈബ്
പ്രോഡക്ട്സ്

വൈബ് പ്രോഡക്ട്സിന്റെ ഭാഗമായി ആരംഭിച്ച നല്ല മീന്‍ പദ്ധതിയില്‍ 11 പേര്‍ പ്രവര്‍ത്തിക്കുന്നു. ഇതില്‍ മൂന്നു പേര്‍ ഫുള്‍ ടൈമായി ദിവസ വേതനാടിസ്ഥാനത്തില്‍ ജോലി ചെയ്യുന്നുണ്ട്. ഈ പദ്ധതിയുടെ മേല്‍നോട്ടത്തിനായി സംരംഭകരായി മൂന്നു പേരുണ്ട്. ഗുണനിലവാരമുള്ള പച്ച മത്സ്യം ജനങ്ങളിലേക്ക് എത്തിക്കുക എന്ന ലക്ഷ്യത്തോടെ സഞ്ചരിക്കുന്ന മത്സ്യമാര്‍ക്കറ്റായ നല്ല മീന്‍ പദ്ധതി മികച്ച രീതിയില്‍ മുന്നോട്ടു പോകുന്നു. ഫോണ്‍ മുഖാന്തിരം മത്സ്യം ഓര്‍ഡര്‍ ചെയ്യാനും ഓര്‍ഡര്‍ ചെയ്യുന്ന മത്സ്യം വീടുകളില്‍ എത്തിക്കാനും സൗകര്യമൊരുക്കിയിട്ടുണ്ട്. മീന്‍വില ഓണ്‍ലൈനായും അടയ്ക്കാം. പ്രോഡക്ട് വിഭാഗത്തില്‍ വൈബ് ഫുഡ്സ്, ഗുണമേന്മയുള്ള മല്ലിപ്പൊടി, മുളകുപൊടി, മഞ്ഞള്‍പ്പൊടി, കാശ്മീരി മുളകുപൊടി, അരിപ്പൊടി തുടങ്ങിവയാണുള്ളത്. ഇതിന്റെ പ്രവര്‍ത്തനം വാര്‍ഡുതലത്തിലുള്ള തൊഴില്‍രഹിതരായ വീട്ടമ്മമാരുടെ പങ്കാളിത്തം ഉറപ്പുവരുത്തിക്കൊണ്ടാണ്. എക്സ്പോര്‍ട്ട് ക്വാളിറ്റി നിലനിര്‍ത്തിക്കൊണ്ടുള്ള വിവിധ തരം സ്നാക്ക്സ് ഉള്‍പ്പെടുത്തിക്കൊണ്ടുള്ള വിഭാഗമാണു വൈബ് സ്നാക്ക്സ്. വൈബ് ഫുഡ്സും സ്നാക്ക്സും ഓണ വിപണിയില്‍ എത്തിക്കാനുള്ള തയാറെടുപ്പിലാണു സംഘം.

വൈബ്
ഐ.ടി.

വൈബ് ഐ.ടി. യുടെ കീഴില്‍ കോള്‍ സെന്റര്‍ നടത്തിവരുന്നു. കോള്‍ സെന്ററില്‍ രണ്ടു ഷിഫ്റ്റുകളിലായി 10 പേര്‍ താല്‍കാലികാടിസ്ഥാനത്തില്‍ ജോലി ചെയ്യുന്നുണ്ട്. വൈബ് സൊസൈറ്റിയുടെ എല്ലാ പ്രവര്‍ത്തനങ്ങളെയും ഏകോപിപ്പിച്ച് കൂടുതല്‍ മികവുറ്റ സേവനങ്ങള്‍ ജനങ്ങള്‍ക്കു നല്‍കുക എന്നതാണു വൈബ് ജനറല്‍ കോള്‍ സെന്ററിന്റെ പ്രധാന ഉദ്ദേശ്യം. ഈ പദ്ധതിയുടെ സംരംഭകരായി മൂന്നു പേര്‍ പ്രവര്‍ത്തിക്കുന്നു. സോഫ്റ്റ്്‌വെയര്‍ ഡവലപ്മെന്റ്, മൊബൈല്‍ ആപ്ലിക്കേഷന്‍ ഡവലപ്മെന്റ്, ഐ.ടി സപ്പോര്‍ട്ട് സര്‍വീസസ് എന്നിവയാണു വൈബ് ഐ.ടി. യിലൂടെ ലക്ഷ്യമിടുന്നത്. തിരുവനന്തപുരം നഗരസഭയില്‍ പരാതി പരിഹാര സെല്‍, സെപ്റ്റേജ് മാനേജ്മെന്റ് സിസ്റ്റം, കുടിവെള്ള വിതരണ മാനേജ്മെന്റ് സിസ്റ്റം എന്നിവയും സംഘം നടത്തിവരുന്നു. ഡി.ടി.പി.സി.യുമായി സഹകരിച്ച് തിരുവനന്തപുരം ജില്ലയിലെ വിനോദ സഞ്ചാര കേന്ദ്രങ്ങളിലെ പാര്‍ക്കിംഗ് മാനേജ്മെന്റ്, ടിക്കറ്റിംഗ്, പേ ആന്റ് പാര്‍ക്ക് എന്നിവ നടത്തുന്നു.

മാലിന്യ പരിപാലനം
കുറഞ്ഞ ചെലവില്‍

മാലിന്യപരിപാലന സേവനങ്ങളാണു വൈബ് ഗ്രീനിന്റെ ഒരു പരിപാടി. വിളപ്പില്‍ശാല മാലിന്യനിര്‍മാര്‍ജന കേന്ദ്രത്തിന്റെ പ്രവര്‍ത്തനം നിലച്ചപ്പോള്‍ തിരുവനന്തപുരത്തു കുന്നുകൂടിയ മാലിന്യത്തിനു പരിഹാരമായി മുന്‍ മേയര്‍ വി.കെ. പ്രശാന്താണ് ഈ മാര്‍ഗം അവതരിപ്പിച്ചത്. അദ്ദേഹത്തിന്റെ നേതൃത്വത്തില്‍ വട്ടിയൂര്‍ക്കാവ് യൂത്ത് ബ്രിഗേഡ് എന്റര്‍പ്രണേഴ്സ് കോ-ഓപ്പറേറ്റീവ് സൊസൈറ്റിയിലെ യുവാക്കള്‍ ഒത്തുചേര്‍ന്നപ്പോള്‍ തിരുവനന്തപുരം കോര്‍പ്പറേഷനിലെ 50,000 വീടുകളില്‍ ഉറവിടമാലിന്യ സംസ്‌കരണ രീതി ആരംഭിച്ചു. കോയമ്പത്തൂര്‍ ആസ്ഥാനമായി പ്രവര്‍ത്തിക്കുന്ന ശാസ്ത്രജ്ഞന്‍ ഡോ: ജോഷി ചെറിയാനാണ് ഈ സംവിധാനം കണ്ടെത്തിയിട്ടുള്ളത്. പ്രത്യേക രീതിയില്‍ നിര്‍മിച്ച രണ്ട് ബക്കറ്റുകള്‍ യോജിപ്പിച്ച ഉപകരണമാണ് ഏയ്റോബിക് രീതിയിലുള്ള ഈ മാലിന്യ സംസ്‌കരണത്തിനായി ഉപയോഗിക്കുന്നത്. വിവിധ പ്രക്രിയകളിലൂടെ കടന്നുപോയ ചകിരിച്ചോറ് മാത്രമാണ് ഇതിനാവശ്യമുള്ളത്. 1800 രൂപ ചെലവ് വരുന്ന മാലിന്യനിര്‍മാര്‍ജന ഉപകരണം 10 വര്‍ഷംവരെ ഈടുനില്‍ക്കുമെന്നു സൊസൈറ്റി ഉറപ്പു നല്‍കുന്നു. സംസ്ഥാനം മുഴുവന്‍ ഈ പദ്ധതി വ്യാപിപ്പിക്കാനാണു സംഘത്തിന്റെ തീരുമാനം. കൂടാതെ, മാലിന്യപരിപാലനത്തിനാവശ്യമായ ഉപകരണങ്ങളും സംഘം നല്‍കുന്നുണ്ട്.

വൈബ് ഗ്രീന്‍
ആന്റ് ടൂറിസം

നിലവില്‍ നാലു പേരാണു സംരംഭകരായി വൈബ് ഗ്രീനിന്റെ പ്രവര്‍ത്തനങ്ങള്‍ ഏകോപിപ്പിക്കുന്നത്. ഈ വൈബിന്റെ കീഴില്‍ ഇരുപതോളം പേര്‍ക്കു തൊഴില്‍ കണ്ടെത്താന്‍ സാധിച്ചിട്ടുണ്ട്. മട്ടുപ്പാവിലും പറമ്പുകളിലും ജൈവക്കൃഷി നടത്തുക, വിനോദ സഞ്ചാര മേഖലയില്‍ സ്വയംതൊഴില്‍ സംരംഭകരെ സൃഷ്ടിക്കുക എന്നതാണു വൈബ് ഗ്രീനിന്റെ പ്രധാന ലക്ഷ്യം. പരിസ്ഥിതി സംരക്ഷണവും ഉത്തരവാദിത്തത്തോടെയുള്ള വിനോദസഞ്ചാരവും എന്ന ലക്ഷ്യവുമായാണു വൈബ് ഗ്രീന്‍ പ്രവര്‍ത്തിക്കുന്നത്. തദ്ദേശ സ്വയംഭരണ സ്ഥാപനങ്ങളുമായി സഹകരിച്ച് ഉറവിട മാലിന്യ സംസ്‌കരണത്തിനാവശ്യമായ ബയോ കംപോസ്റ്റര്‍ ബിന്നും ഇനോക്കുലവും ( ചകിരിച്ചോര്‍ മിശ്രിതം) ലഭ്യമാക്കുന്നു. കൃഷിക്കാവശ്യമായ മണ്ണ്, വളം, ചെടി, ചെടിച്ചട്ടി, ജൈവ കീടനാശിനി എന്നിവയും ഈ പദ്ധതിയുടെ ഭാഗമായി നല്‍കുന്നു. പരിപാലനത്തിനായി പരിശീലനം കിട്ടിയ തൊഴിലാളികളുടെ സേവനവും കൊടുക്കുന്നുണ്ട്. ജൈവ ഉല്‍പ്പന്നങ്ങള്‍ നേരിട്ട് ജനങ്ങളില്‍ എത്തിക്കുന്നതിനായി ഓണ്‍ലൈന്‍ പോര്‍ട്ടലായ ംംം.്്യയലഴൃലലി.രീാ ആരംഭിച്ചിട്ടുണ്ട്. വിനോദസഞ്ചാര മേഖലയിലെ പദ്ധതികളുടെ ആസൂത്രണവും നിര്‍വ്വഹണവും ഏറ്റെടുത്തു നടപ്പാക്കുകയും കൂടുതല്‍ സ്വയംസംരംഭകരെ സൃഷ്ടിക്കുകയുമാണു ലക്ഷ്യം. ഇതിന്റെ ഭാഗമായി ഡി.ടി.പി.സി. യുമായി സഹകരിച്ചുകൊണ്ടുള്ള പ്രവര്‍ത്തനങ്ങള്‍ ആരംഭിച്ചുകഴിഞ്ഞു.

കഴിഞ്ഞ ഏപ്രിലില്‍ കൊച്ചി മറൈന്‍ഡ്രൈവില്‍ നടന്ന സഹകരണ എക്സ്പോ- 2022 ല്‍ വട്ടിയൂര്‍ക്കാവ് സഹകരണ സംഘത്തിന്റെ സ്റ്റാള്‍ പ്രത്യേകം ശ്രദ്ധിക്കപ്പെട്ടു. സംഘത്തിന്റെ മാലിന്യ നിര്‍മാര്‍ജന ഉപകരണത്തെയും സംസ്‌കരണ പ്രക്രിയയെയുംകുറിച്ചറിയാന്‍ ധാരാളം പേര്‍ സ്റ്റാള്‍ സന്ദര്‍ശിക്കുകയുണ്ടായി.

തുടക്കക്കാരാണെങ്കിലും വട്ടിയൂര്‍ക്കാവ് യൂത്ത് സഹകരണ സംഘം മികച്ച പ്രവര്‍ത്തനത്തിലൂടെ ജനങ്ങളുടെ ശ്രദ്ധ നേടിക്കഴിഞ്ഞു. പുതിയ പ്രവര്‍ത്തനമേഖലകളിലേക്കു കടക്കാന്‍ സംഘം തീരുമാനിച്ചിട്ടുണ്ട്. ഇതിനായി വൈബ് മീഡിയ, വൈബ് സര്‍വീസസ്, വൈബ് അക്കാദമിക്സ്, വൈബ് കണ്‍സ്ട്രക്ഷന്‍ എന്നീ ഡിവിഷനുകള്‍ ഉടന്‍ പ്രവര്‍ത്തനം ആരംഭിക്കും.

രതീഷ്. സി.എസ്. ആണു സംഘം പ്രസിഡന്റ്. ഗിരീഷ് കുമാര്‍. ആര്‍, ഗോവിന്ദ്. ആര്‍, തോമസ്.കെ.വര്‍ഗീസ്, നിഷാദ്.എന്‍.പി, വി.കെ. പ്രശാന്ത്, ജിഷ്ണു.ജെ.മേനോന്‍, രാജിമോള്‍.പി, വിദു വിക്രമന്‍, ഡോ: റീന കെ.എസ്, വനിത.പി. എന്നിവര്‍ ഭരണസമിതിയംഗങ്ങളാണ്. രാധികാ രാമചന്ദ്രനാണു സെക്രട്ടറി.

Leave a Reply

Your email address will not be published.

Latest News