അഡ്വ. ഗംഗാധരക്കുറുപ്പിനു റോബര്‍ട്ട് ഓവന്‍ പുരസ്‌കാരം;ഭരണിക്കാവ്, ഊരാളുങ്കല്‍,വാരപ്പെട്ടി, പള്ളിയാക്കല്‍ സംഘങ്ങള്‍ക്കും പുരസ്‌കാരം

Deepthi Vipin lal

സഹകരണ പ്രസ്ഥാനത്തിന്റെ ഉപജ്ഞാതാവായ റോബര്‍ട്ട് ഓവന്റെ പേരില്‍ സഹകരണ വകുപ്പ് നല്‍കുന്ന പുരസ്‌കാരത്തിനു പ്രമുഖ സഹകാരി അഡ്വ. ഗംഗാധരക്കുറുപ്പ് ( കൊല്ലം ) അര്‍ഹനായി. കണ്‍സ്യൂമര്‍ഫെഡ്, കാപെക്സ് എന്നിവയുടെ മുന്‍ ചെയര്‍മാനായ ഗംഗാധരക്കുറുപ്പ് നാഷണല്‍ കോ-ഓപ്പറേറ്റീവ് യൂണിയന്‍ വൈസ് ചെയര്‍മാനുമായിരുന്നു. കോ-ഓപ് ഡെ പുരസ്‌കാരത്തിനു ആലപ്പുഴ ഭരണിക്കാവ് സര്‍വീസ് സഹകരണ ബാങ്കും സഹകരണ മന്ത്രിയുടെ പ്രത്യേക പുരസ്‌കാരത്തിനു ഊരാളുങ്കല്‍ ലേബര്‍ കോണ്‍ട്രാക്ട് സഹകരണ സംഘവും അര്‍ഹമായി. ഇന്നവേഷന്‍ അവാര്‍ഡ് എറണാകുളം വാരപ്പെട്ടി സര്‍വീസ് സഹകരണ ബാങ്കിനും എക്സലന്‍സ് അവാര്‍ഡ് എറണാകുളം പള്ളിയാക്കല്‍ സര്‍വീസ് സഹകരണ സംഘത്തിനും ലഭിച്ചു.

അന്താരാഷ്ട്ര സഹകരണ ദിനാഘോഷത്തിന്റെ ഭാഗമായി ജൂലായ് രണ്ടിനു കോട്ടയം മാമന്‍ മാപ്പിള ഹാളില്‍ നടക്കുന്ന സംസ്ഥാനതല പരിപാടികള്‍ വിശദീകരിക്കാന്‍ കോട്ടയത്തു നടത്തിയ പത്രസമ്മേളനത്തില്‍ സഹകരണ മന്ത്രി വി.എന്‍. വാസവനാണ് അവാര്‍ഡുകള്‍ പ്രഖ്യാപിച്ചത്.

മറ്റു വിഭാഗങ്ങളില്‍ അവാര്‍ഡുകള്‍ നേടിയ സഹകരണ സ്ഥാപനങ്ങള്‍ ഇവയാണ് :  അര്‍ബന്‍ ബാങ്ക്:  1. പീപ്പിള്‍സ് അര്‍ബന്‍ സഹകരണ ബാങ്ക് എറണാകുളം, 2. ഒറ്റപ്പാലം അര്‍ബന്‍ സഹകരണ ബാങ്ക്, 3. ചെര്‍പ്പുളശ്ശേരി സര്‍വീസ് അര്‍ബന്‍ ബാങ്ക്.  പ്രാഥമിക കാര്‍ഷിക ഗ്രാമവികസന ബാങ്ക് : 1. കണയന്നൂര്‍ താലൂക്ക് പ്രാഥമിക കാര്‍ഷിക ഗ്രാമവികസന ബാങ്ക് എറണാകുളം, 2. ആലത്തൂര്‍ പ്രാഥമിക സഹകരണ കാര്‍ഷിക ഗ്രാമവികസന ബാങ്ക് പാലക്കാട്, 3. പീരുമേട് താലൂക്ക് പ്രാഥമിക സഹകരണ കാര്‍ഷിക ഗ്രാമവികസന ബാങ്ക് ഇടുക്കി. പ്രാഥമിക കാര്‍ഷിക വായ്പാ സഹകരണ സംഘം : 1. പനയാല്‍ സര്‍വീസ് സഹകരണ ബാങ്ക് കാസര്‍കോട്, 2. ചെറുതാഴം സര്‍വീസ് ബാങ്ക് കണ്ണൂര്‍, 3. തിമിരി സര്‍വീസ് സഹകരണ ബാങ്ക് കാസര്‍കോട്. എംപ്ലായീസ് സഹകരണ സംഘം : 1. തിരുവല്ല ഗവ. എംപ്ലായീസ് സഹകരണ സംഘം പത്തനംതിട്ട, 2. മലപ്പുറം എയ്ഡഡ് സ്‌കൂള്‍ ടീച്ചേഴ്സ് സഹകരണ സംഘം, 3. എറണാകുളം ഡിസ്ട്രിക്ട് പോലീസ് ക്രെഡിറ്റ് സഹകരണ സംഘം. വനിതാ സഹകരണ സംഘം : വെള്ളോറ വനിതാ സഹകരണ സംഘം കണ്ണൂര്‍, 2. ഉദുമ വനിതാ സഹകരണ സംഘം കാസര്‍കോട്, 3. നെല്ലിമൂട് വനിതാ സഹകരണ സംഘം തിരുവനന്തപുരം. പട്ടികജാതി / പട്ടികവര്‍ഗ സഹകരണ സംഘം : 1. വള്ളിച്ചിറ പട്ടികജാതി സഹകരണ സംഘം തിരുവനന്തപുരം, 2. എളംകുന്നപ്പുഴ പട്ടികജാതി / പട്ടികവര്‍ഗ സഹകരണ സംഘം എറണാകുളം, 3. തിരുനെല്ലി പട്ടികവര്‍ഗ സഹകരണ സംഘം വയനാട്. ആശുപത്രി സഹകരണ സംഘം : 1. കൊല്ലം ജില്ലാ സഹകരണാശുപത്രി , 2. കോഴിക്കോട് ജില്ലാ സഹകരണാശുപത്രി, 3. കാസര്‍കോട് ജില്ലാ സഹകരണാശുപത്രി. പലവക സഹകരണ സംഘം : 1. കേരള പോലീസ് ഹൗസിങ് സഹകരണ സംഘം എറണാകുളം, 2. കൊച്ചിന്‍ നേവല്‍ ബേസ് കണ്‍സ്യൂമര്‍ സംഘം, 3. സേവ് ഗ്രീന്‍ അഗ്രിക്കള്‍ച്ചറിസ്റ്റ് വെല്‍ഫെയര്‍ സഹകരണ സംഘം കോഴിക്കോട്. വിദ്യാഭ്യാസ സഹകരണ സംഘം : 1. തളിപ്പറമ്പ് വിദ്യാഭ്യാസ സഹകരണ സംഘം കണ്ണൂര്‍, 2. മണ്ണാര്‍ക്കാട് വിദ്യാഭ്യാസ സഹകരണ സംഘം പാലക്കാട്, 3. തിരൂര്‍ താലൂക്ക് വിദ്യാഭ്യാസ സഹകരണ സംഘം മലപ്പുറം. മാര്‍ക്കറ്റിങ് സംഘം : ജൂറിയുടെ പ്രത്യേക പ്രോത്സാഹന സമ്മാനം മാത്രം. എന്‍.എം.ഡി.സി. കോഴിക്കോട്, റീജ്യണല്‍ ഫ്രൂട്സ് ആന്റ് വെജിറ്റബിള്‍ പ്രൊഡ്യൂസേഴ്സ് മാര്‍ക്കറ്റിങ് സഹകരണ സംഘം കണ്ണൂര്‍. ഒന്നാം സ്ഥാനത്തിനു ഒരു ലക്ഷം രൂപയും രണ്ടാം സ്ഥാനത്തിനു അമ്പതിനായിരം രൂപയും മൂന്നാം സ്ഥാനത്തിനു ഇരുപത്തിയയ്യായിരം രൂപയും ട്രോഫിയുമാണ് അവാര്‍ഡ്.

ശനിയാഴ്ച രാവിലെ പത്തു മണിക്കു സഹകരണ സംഘം രജിസ്ട്രാര്‍ അലക്സ് വര്‍ഗീസ് പതാകയുയര്‍ത്തുന്നതോടെ സഹകരണ ദിനാഘോഷ പരിപാടികള്‍ തുടങ്ങുമെന്നു മന്ത്രി വി.എന്‍. വാസവന്‍ അറിയിച്ചു. തുടര്‍ന്നു മൂന്നു വിഷയങ്ങളില്‍ സെമിനാറുകളുണ്ടാവും. സെമിനാര്‍ സംസ്ഥാന സഹകരണ യൂണിയന്‍ ചെയര്‍മാന്‍ കോലിയക്കോട് കൃഷ്ണന്‍ നായര്‍ ഉദ്ഘാടനം ചെയ്യും. സര്‍ക്കിള്‍ സഹകരണ യൂനിയന്‍ ചെയര്‍മാന്‍ കെ.എം. രാധാകൃഷ്ണന്‍ അധ്യക്ഷത വഹിക്കും. പ്രൊഫ. ജിജു പി. അലക്സ്, കണ്‍സ്യൂമര്‍ഫെഡ് ചെയര്‍മാന്‍ എം. മെഹബൂബ്, പ്ലാനിങ് ബോര്‍ഡംഗം മിനി സുകുമാര്‍ എന്നിവര്‍ പ്രബന്ധങ്ങളവതരിപ്പിക്കും. പ്രമുഖ സഹകാരികളും സാമ്പത്തിക വിദഗ്ധരും സെമിനാറില്‍ സംസാരിക്കും.

രണ്ടു മണിക്കു സഹകരണ ദിനാഘോഷം സഹകരണ മന്ത്രി വി.എന്‍. വാസവന്‍ ഉദ്ഘാടനം ചെയ്യും. തിരുവഞ്ചൂര്‍ രാധാകൃഷ്ണന്‍ എം.എല്‍.എ. അധ്യക്ഷത വഹിക്കും. തോമസ് ചാഴികാടന്‍ എം.പി. മുഖ്യ പ്രഭാഷണം നടത്തും.

സഹകരണ രംഗത്ത

അര നൂറ്റാണ്ട്

മികച്ച സഹകാരിക്കുള്ള റോബര്‍ട്ട് ഓവന്‍ പുരസ്‌കാരം നേടിയ കൊല്ലം ശൂരനാട് സ്വദേശിയായ എം. ഗംഗാധരക്കുറുപ്പ് അമ്പതു വര്‍ഷമായി സഹകരണ മേഖലയിലെ സജീവ സാന്നിധ്യമാണ്. സംസ്ഥാന സഹകരണ യൂണിയന്‍ എക്സിക്യൂട്ടീവംഗം, ജില്ലാ സഹകരണ ബാങ്ക് ഭരണസമിതിയംഗം തുടങ്ങിയ നിലകളിലും പ്രവര്‍ത്തിച്ചു. തിരുവനന്തപുരത്തെ കോ-ഓപ്പറേറ്റീവ് കോളേജിന്റെ സ്ഥാപകനാണ്. ഏജീസ് ഓഫീസ് ഉദ്യോഗസ്ഥനായിരുന്ന ഇദ്ദേഹത്തെ കമ്യൂണിസ്റ്റ് ബന്ധം ആരോപിച്ച് ഇന്ദിരാസര്‍ക്കാര്‍ പുറത്താക്കിയിരുന്നു. പിന്നീട് സജീവ രാഷ്ട്രീയ പ്രവര്‍ത്തകനും സഹകാരിയുമായി. സി.പി.എം. ജില്ലാ കമ്മിറ്റിയിലും ജില്ലാ സെക്രട്ടേറിയറ്റിലും അംഗമായിരുന്ന ഈ എഴുപത്തിയാറുകാരന്‍ കര്‍ഷകസംഘത്തിന്റെയും നേതാവായിരുന്നു. ഇപ്പോള്‍ ശൂരനാട് ഏരിയാ കമ്മിറ്റിയംഗം. ഭാര്യ: അഡ്വ. എസ്. ലീല. മകന്‍: അശോകന്‍ (അധ്യാപകന്‍).

Leave a Reply

Your email address will not be published.

Latest News