സഹകരണസര്‍വകലാശാല ദളിത്‌സംരംഭകര്‍ക്കു ബിസിനസ്‌വേഗതാ പരിശീലനത്തിന്‌ അപേക്ഷ ക്ഷണിച്ചു
- ഒരുലക്ഷംരൂപ ഫീസില്‍ 90,000രൂപ എന്‍എസ്‌എച്ച്‌എസ്‌ വഹിക്കും
- 30ലക്ഷംവരെ ഫണ്ടിങ്‌ സപ്പോര്‍ട്ട്‌
ഗുജറാത്തിലെ ആനന്ദ്‌ ഗ്രാമീണസഹകരണമാനേജ്‌മെന്റ്‌ ഇന്‍സ്‌റ്റിറ്റിയൂട്ട്‌ ആസ്ഥാനമായി പ്രവര്‍ത്തിക്കുന്ന ദേശീയസഹകരണസര്‍വകലാശാലയായ ത്രിഭുവന്‍ സഹകാരി യൂണിവേഴ്‌സിറ്റി പട്ടികജാതി-പട്ടികവര്‍ഗസംരംഭകര്‍ക്കായി ബിസിനസ്‌ വേഗവര്‍ധനാ സര്‍ട്ടിഫിക്കറ്റ്‌ കോഴ്‌സിന്‌ (ബിസിനസ്‌ ആക്‌സിലറേഷന്‍ പ്രോഗ്രാം) അപേക്ഷ ക്ഷണിച്ചു. 30ലക്ഷംരൂപവരെ സാമ്പത്തികസഹായം ലഭിച്ചേക്കാവുന്ന കോഴ്‌്‌സിന്റെ ഫീസ്‌ ഒരുലക്ഷം രൂപയും ജിഎസ്‌ടിയുമാണ്‌. ഇതില്‍ 90% (90000രൂപയും ജിഎസ്‌ടിയും ദേശീയ പട്ടികജാതി-പട്ടികവര്‍ഗ കേന്ദ്രസ്‌കീമില്‍ (എന്‍എസ്‌എച്ച്‌എസ്‌) നിന്നുള്ള സഹായമാണ്‌. ബാക്കി 10,000 രൂപയും ജിഎസ്‌ടിയും തിരഞ്ഞെടുക്കപ്പെടുന്നവര്‍ വഹിച്ചാല്‍ മതിയാകും. വിലയിരുത്തലില്‍ 70ശതമാനത്തിലേറെ മികവുള്ളവര്‍ക്ക്‌ 5000 രൂപ സ്‌കോളര്‍ഷിപ്പും കിട്ടും.
കേന്ദ്രഎംഎസ്‌എംഇ മന്ത്രാലയത്തിന്റെ എന്‍എസ്‌എസ്‌എച്ച്‌ സഹായത്തോടെയുള്ള പരിശീലനം എന്‍എസ്‌ഐസി, ഡിഐസിസിഐ, ഇര്‍മ ഐസീഡ്‌ (സാമൂഹികസംരംഭങ്ങളുടെയും സംരംഭകരുടെയും വികസനത്തിനായുള്ള സംവിധാനം) തുടങ്ങിയവയുടെയും സഹകരണത്തോടെയാണു സംഘടിപ്പിക്കുന്നത്‌. പട്ടികജാതി-പട്ടികവര്‍ഗക്കാരായ സംരംഭകര്‍ക്കും അവരുടെ സംരക്ഷണത്തിലുള്ള (wards) സംരംഭകരാകാന്‍ താല്‍പര്യമുള്ളവര്‍ക്കും അപേക്ഷിക്കാം. സംരംഭകരുടെ സംരക്ഷണയിലുള്ള അപേക്ഷകര്‍ക്കു 18വയസ്സിനുമുകളില്‍ പ്രായം ഉണ്ടായിരിക്കണം. ഏതെങ്കിലും വിഷയത്തില്‍ ബിരുദവും യോഗ്യതാവ്യവസ്ഥകളില്‍ പറയുന്നുണ്ട്‌. സംരംഭകരാണെങ്കില്‍ ബിസിനസിന്റെതെളിവ്‌ (ഉദ്യം/ജിഎസ്‌ടി/ ലൈസന്‍സ്‌) വേണം. നവംബര്‍ 30നകം അപേക്ഷിക്കണം. ഡിസംബര്‍ 15 ക്ലാസ്‌ തുടങ്ങും. സരംഭകശേഷിയും ബിസിനസ്‌ മികവും വര്‍ധിപ്പിക്കല്‍, ബിസിനസില്‍ സുസ്ഥിരമായി വളരാന്‍ പ്രാപ്‌തരാക്കല്‍ എന്നിവയാണു ലക്ഷ്യങ്ങള്‍.
ആറുദിവസം ഇര്‍മയില്‍ താമസിച്ചു പഠിക്കണം. ദിവസവും ആറുമണിക്കൂര്‍ ക്ലാസ്സും ഒന്നരമണിക്കൂര്‍ പ്രോജക്ട്‌ വര്‍ക്കും. ആകെ 45 മണിക്കൂര്‍. മൂന്നുമാസം (12 ആഴ്‌ച) ഓണ്‍ലൈന്‍ ക്ലാസ്സാണ്‌. ശനിയാഴ്‌ചയും ഞായറാഴ്‌ചയുമായിരിക്കും ഇത്‌. ഈ ദിവസങ്ങളില്‍ 3-4 മണിക്കൂര്‍ ക്ലാസ്സുണ്ടാകും. ആകെ 36 മണിക്കൂര്‍. സംശയങ്ങള്‍ തീര്‍ക്കാനും മൂന്നുമണിക്കൂറുണ്ട്‌. തുടര്‍ന്ന്‌ ആറുമാസം മാര്‍ഗനിര്‍ദേശ-ഉപദേശസഹായങ്ങളും (mentoring) പ്രോജക്ട്‌ പരിചയപ്പെടുത്തല്‍ (project pitching) സഹായങ്ങളും കിട്ടും.
ഇര്‍മയിലെയും ത്രിഭുവന്‍ സഹകരണസര്‍വകലാശാലയിലെയും വിദഗ്‌ധരാണു ക്ലാസ്സുകള്‍ നയിക്കുക. യാഥാര്‍ഥ്യപ്രതീതിമാതൃകകളുടെ സഹായത്തോടെയുള്ള പരിശീലനങ്ങള്‍, പ്രായോഗികപരിശീലനങ്ങള്‍, പ്രശ്‌നപരിഹാരശില്‍പശാലകള്‍, വ്യവസായവിദഗ്‌ധരുടെയും നയനിര്‍മാതാക്കളുടെയും മികച്ച സംരംഭകരുടെയും പ്രഭാഷണങ്ങള്‍, വിജയംകൈവരിച്ച സാമൂഹികസംരംഭങ്ങളിലും സഹകരണസംരംഭങ്ങളിലും സന്ദര്‍ശനങ്ങള്‍, ഇര്‍മ ഐസീഡ്‌ ഫൗണ്ടേഷനില്‍നിന്നു 30ലക്ഷംരൂപവരെ ധനസഹായം കിട്ടാനുള്ള സാധ്യത എന്നിവ കോഴ്‌സിലുണ്ട്‌. കൂടുതല്‍ വിവരങ്ങളും അപേക്ഷിക്കാനുള്ള ലിങ്കും ഇര്‍മയുടെ വെബ്‌സൈറ്റില്‍ (https://irma.ac.inhttps://irma.ac.in) ഉണ്ട്‌.
