കാലിക്കറ്റ് സിറ്റി ബാങ്ക് ബാങ്കിങ് ലൈസന്‍സിന് അപേക്ഷിച്ചു

Deepthi Vipin lal

ബാങ്ക് ലൈസന്‍സിനായി കാലിക്കറ്റ് സിറ്റി സര്‍വീസ് കോ-ഓപ്പറേറ്റീവ് ബാങ്ക് അപേക്ഷിച്ചതായി റിസര്‍വ് ബാങ്ക് അറിയിച്ചു. സ്വകാര്യമേഖലയിലെ യൂണിവേഴ്സല്‍ ബാങ്കുകളുടെയും ചെറുകിട ധനകാര്യ ബാങ്കുകളുടെയും ലൈസന്‍സിങ്ങിന് ‘ഓണ്‍ ടാപ്പ്’ മാര്‍ഗനിര്‍ദ്ദേശങ്ങള്‍ പ്രകാരം അപേക്ഷകരുടെ പേരുകള്‍ റിസര്‍വ് ബാങ്ക് ഏപ്രില്‍ 15ന് പുറത്തിറക്കി. ഈ പേരുകളില്‍ കാലിക്കറ്റ് സിറ്റി സര്‍വീസ് കോ-ഓപ്പറേറ്റീവ് ബാങ്കും ഉള്‍പ്പെട്ടിട്ടുണ്ട്.

യു.എ.ഇ എക്സ്ചേഞ്ച്, ഫിനാന്‍ഷ്യല്‍ സര്‍വീസസ് ലിമിറ്റഡ്, ദി റീപ്പാട്രിയേറ്റ്സ് കോ-ഓപ്പറേറ്റീവ് ഫിനാന്‍സ് ആന്‍ഡ് ഡവലപ്മെന്റ് ബാങ്ക് ലിമിറ്റഡ് (റെപ്കോ ബാങ്ക്), ചൈതന്യ ഇന്ത്യ ഫിന്‍ ക്രെഡിറ്റ് പ്രൈവറ്റ് ലിമിറ്റഡ്, ശ്രീ പങ്കജ് വൈഷ് എന്നിവരാണ് യൂണിവേഴ്സല്‍ ബാങ്കുകളുടെ ലൈസന്‍സിനായുള്ള അപേക്ഷകര്‍.

ചെറുകിട ധനകാര്യ ബാങ്കുകളുടെ ലൈസന്‍സിനാണ് കാലിക്കറ്റ് സിറ്റി സര്‍വീസ് കോ-ഓപ്പറേറ്റീവ് ബാങ്ക് ലിമിറ്റഡ് അപേക്ഷ നല്‍കിയിരുന്നത്. ഈ വിഭാഗത്തില്‍ വിസോഫ്റ്റ് ടെക്നോളജീസ് പ്രൈവറ്റ് ലിമിറ്റഡ്, അഖില്‍ കുമാര്‍ ഗുപ്ത, ദ്വാര ക്ഷത്രിയ ഗ്രാമിണ്‍ ഫിനാന്‍ഷ്യല്‍ സര്‍വീസസ് പ്രൈവറ്റ് ലിമിറ്റഡ് എന്നിവരും ഉള്‍പ്പെടുന്നു.

സഹകരണ സംഘങ്ങള്‍ക്കും ചെറുകിട ധനകാര്യ ബാങ്ക് ആകാന്‍ അപേക്ഷിക്കാമെന്ന് റിസര്‍വ് ബാങ്ക് സര്‍ക്കുലര്‍ ഇറക്കിയതിനെ തുടര്‍ന്നാണ് അപേക്ഷ നല്‍കിയത്. ഈ അപേക്ഷ കഴിഞ്ഞ വര്‍ഷം ജനുവരിയിലാണ് കൊടുത്തത്. ആര്‍ബി.ഐ.യുടെ ലൈസന്‍സുണ്ടെങ്കില്‍ മാത്രമാണ് ബാങ്ക് എന്ന പേരില്‍ പ്രവര്‍ത്തിക്കാന്‍ കഴിയൂ. ഇതിലൂടെ സൊസൈറ്റി എന്ന പേരില്‍ നിന്ന് ബാങ്കായി മാറുകയാണ് ചെയ്യുന്നത്. ആര്‍.ബിയഐയുടെ ലൈസന്‍സ് കിട്ടിയാല്‍ ബാങ്കായി പ്രവര്‍ത്തിക്കാന്‍ കഴിയുമെന്നും ഉപഭോക്താക്കള്‍ക്ക് അത് ഏറെ ഗുണം ചെയ്യുമെന്നും കാലിക്കറ്റ് സിറ്റി സര്‍വീസ് കോ-ഓപ്പറേറ്റീവ് ബാങ്ക് ജനറല്‍ മാനേജര്‍ സാജു ജെയിംസ് പറഞ്ഞു.

സ്വകാര്യ മേഖലയിലെ യൂണിവേഴ്സല്‍ ബാങ്കുകളുടെയും ചെറുകിട ധനകാര്യ ബാങ്കുകളുടെയും ലൈസന്‍സിങ്ങിനായുള്ള മാര്‍ഗനിര്‍ദ്ദേശങ്ങള്‍ 2016 ഓഗസ്റ്റ് ഒന്നിനും 2019 ഡിസംബര്‍ അഞ്ചിനും റിസര്‍വ് ബാങ്ക് പുറത്തിറക്കി. മേല്‍പ്പറഞ്ഞ മാര്‍ഗനിര്‍ദ്ദേശങ്ങള്‍ പ്രകാരം ലഭിച്ച അപേക്ഷകള്‍ വിലയിരുത്തുന്നതിനുള്ള സ്റ്റാന്‍ഡിങ് ബാഹ്യ ഉപദേശക സമിതിയുടെ ഭരണഘടനയും 2021 മാര്‍ച്ച് 22ന് പ്രഖ്യാപിച്ചു.

ഈ അപേക്ഷകള്‍ ഒരു ആര്‍.ബി.ഐ. പാനല്‍ വിലയിരുത്തും. യൂണിവേഴ്സല്‍ ബാങ്കുകള്‍ക്കും ചെറുകിട ധനകാര്യ ബാങ്കുകള്‍ക്കുമായുള്ള അപേക്ഷകള്‍ വിലയിരുത്തുന്നതിനായി ഒരു സ്റ്റാന്‍ഡിങ് എക്സ്റ്റേണല്‍ അഡൈ്വസറി കമ്മിറ്റി (എസ്എസി) രൂപവല്‍ക്കരിക്കുമെന്ന് റിസര്‍വ് ബാങ്ക് കഴിഞ്ഞ മാസം പ്രഖ്യാപിച്ചിരുന്നു. ബാങ്കിങ് പെര്‍മിറ്റുകള്‍ നല്‍കാനുള്ള സെന്‍ട്രല്‍ ബാങ്കിന്റെ നേരത്തെ പ്രഖ്യാപിച്ച പദ്ധതിയുടെ ഭാഗമാണിത്.

മുന്‍ റിസര്‍വ് ബാങ്ക് ഡെപ്യൂട്ടി ഗവര്‍ണര്‍ ശ്യാമള ഗോപിനാഥ്

മുന്‍ റിസര്‍വ് ബാങ്ക് ഡെപ്യൂട്ടി ഗവര്‍ണര്‍ ശ്യാമള ഗോപിനാഥിന്റെ അധ്യക്ഷതയിലാണ് റിസര്‍വ് ബാങ്ക് പാനല്‍ രൂപവല്‍ക്കരിച്ചത്. റിസര്‍വ് ബാങ്ക് ഓഫ് ഇന്ത്യ, സെന്‍ട്രല്‍ ബോര്‍ഡ് ഡയറക്ടര്‍ രേവതി അയ്യര്‍, റിസര്‍വ് ബാങ്ക് മുന്‍ എക്സിക്യൂട്ടീവ് ഡയറക്ടറും ഇപ്പോള്‍ നാഷണല്‍ പേയ്‌മെന്റ്സ് കോര്‍പ്പറേഷന്‍ ഓഫ് ഇന്ത്യ (എന്‍പിസിഐ) ചെയര്‍മാനുമായ ബി. മഹാപത്ര, കാനറ ബാങ്ക് മുന്‍ ചെയര്‍മാന്‍ ടി.എന്‍ മനോഹരന്‍, സ്റ്റേറ്റ് ബാങ്ക് ഓഫ് ഇന്ത്യ മുന്‍ എംഡിയും പെന്‍ഷന്‍ ഫണ്ട് റെഗുലേറ്ററി ആന്‍ഡ് ഡവലപ്മെന്റ് അതോറിറ്റി (പിഎഫ്ആര്‍ഡിഎ) മുന്‍ ചെയര്‍മാനുമായ ഹേമന്ത് ജി തുടങ്ങിയവരാണ് മറ്റ് പാനല്‍ അംഗങ്ങള്‍.


സ്വകാര്യ മേഖലയിലെ സാര്‍വത്രിക ബാങ്കുകള്‍ക്ക് ‘ഓണ്‍-ടാപ്പ്’ ലൈസന്‍സിംഗിനായുള്ള റിസര്‍വ് ബാങ്ക് മാര്‍ഗനിര്‍ദ്ദേശങ്ങളും 2019 ഡിസംബര്‍ 5 ന് സ്വകാര്യമേഖലയിലെ ചെറുകിട ധനകാര്യ ബാങ്കുകള്‍ക്ക് ലൈസന്‍സ് നല്‍കുന്നതിനുള്ള മാര്‍ഗനിര്‍ദ്ദേശങ്ങളും അപേക്ഷകര്‍ക്ക് നല്‍കുമെന്ന് സൂചിപ്പിച്ചിരുന്നു. അപേക്ഷകരുടെ പ്രഥമദൃഷ്ട്യാ യോഗ്യത ഉറപ്പാക്കാന്‍ ആര്‍.ബി.ഐ. തുടക്കത്തില്‍ പരിശോധന നടത്തും.

ബാങ്കിങ്, ധനകാര്യ മേഖല, മറ്റ് പ്രസക്തമായ മേഖലകള്‍ എന്നിവയില്‍ പരിചയസമ്പന്നരായ പ്രമുഖരെ ഉള്‍ക്കൊള്ളുന്ന ഒരു എസ്ഇഎസി അപേക്ഷകള്‍ വിലയിരുത്തുമെന്നും അതിനുശേഷം എസ്ഇഎസിയുടെ രൂപീകരണം റിസര്‍വ് ബാങ്ക് പ്രഖ്യാപിക്കുമെന്നും പ്രസ്താവിച്ചു. ഈ എസ്ഇഎസിയുടെ കാലാവധി മൂന്ന് വര്‍ഷത്തേക്കായിരിക്കുമെന്ന് റിസര്‍വ് ബാങ്ക് വ്യക്തമാക്കിയിരുന്നു.

അവസാന റൗണ്ടില്‍, ആര്‍ബിഐ 2014 ല്‍ രണ്ട് സാര്‍വത്രിക ബാങ്കിങ് ലൈസന്‍സുകള്‍ ഐഡിഎഫ്‌സി ഫസ്റ്റ് ബാങ്കിനും ബന്ദന്‍ ബാങ്കിനും നല്‍കി. 2018 ല്‍ ജനലക്ഷ്മി ഫിനാന്‍ഷ്യല്‍ സര്‍വീസസ്, ബെംഗളൂരു ആസ്ഥാനമായുള്ള ഉജ്ജിവന്‍ ഫിനാന്‍ഷ്യല്‍ സര്‍വീസസ്, ഗുവാഹത്തി ആസ്ഥാനമായുള്ള ആര്‍ജിവിഎന്‍ (നോര്‍ത്ത് ഈസ്റ്റ്) മൈക്രോഫിനാന്‍സ് എന്നീ സ്ഥാപനങ്ങള്‍ ഉള്‍പ്പെടെ 10 ചെറുകിട ധനകാര്യ ബാങ്ക് ലൈസന്‍സുകളും ആര്‍ബിഐ അനുവദിച്ചിരുന്നു.

Leave a Reply

Your email address will not be published.

Latest News