ഡിഎ:രജിസ്‌ട്രാറുടെ ഉത്തരവിനെ പാക്‌സ്‌ അസോസിയേഷന്‍ സ്വാഗതം ചെയ്‌്‌തു

സഹകരണസ്ഥാപനങ്ങളിലെ ഡിഎ സംബന്ധിച്ചു സെപ്‌റ്റംബര്‍ ഒമ്പതിനു സഹകരണരജിസ്‌ട്രാര്‍ ഇറക്കിയ 10686/2025 ഇഎം(4) ഉത്തരവിനെ പ്രാഥമികകാര്‍ഷികവായ്‌പാസഹകരണസംഘം പ്രസിഡന്റുമാരുടെ സംഘടനയായ പാക്‌സ്‌അസോസിയേഷന്‍ സ്വാഗതം ചെയ്‌തു. ജീവനക്കാരുടെ സംഘടനകളുടെ സമ്മര്‍ദത്തിനു വഴങ്ങി ഇതു പിന്‍വലിക്കരുതെന്നു അസോസിയേഷന്‍ സംസ്ഥാനസെക്രട്ടറി പി. ഹരീന്ദ്രന്‍ സഹകരണമന്ത്രിയോട്‌ ആവശ്യപ്പെട്ടു. പുന:പരിശോധിക്കേണ്ടതാണെന്നു തോന്നിയാല്‍ ജീവനക്കാരുടെയും പാക്‌സ്‌ അസോസിയേഷന്റെയും പ്രതിനിധികളുമായി ആലോചിച്ചേ ചെയ്യാവൂ എന്നും ആവശ്യപ്പെട്ടു. വര്‍ധിപ്പിച്ച ക്ഷാമബത്ത നല്‍കാന്‍ എതിരല്ല. പക്ഷേ, സംഘത്തിന്റെ സാമ്പത്തികനില കണക്കിലെടുത്തേ അനുവദിക്കാവൂ. ഇപ്പോള്‍ നടപ്പാക്കാത്തവയ്‌ക്കും സാമ്പത്തികനില മെച്ചപ്പെടുമ്പോള്‍ വര്‍ധിച്ച ഡി.എ. അനുവദിക്കാം. 1598 പാക്‌സുകളില്‍ 1444ല്‍ ഓഡിറ്റു പൂര്‍ത്തിയായപ്പോള്‍ 514എണ്ണം(34%)മാത്രമാണ്‌ അറ്റലാഭത്തിലുള്ളത്‌. തന്‍വര്‍ഷം ലാഭത്തിലുള്ളത്‌ 603 (41%) എണ്ണമാണ്‌. 154 സംഘത്തില്‍ ഓഡിറ്റ്‌ പൂര്‍ത്തിയാക്കാനുണ്ട്‌. പലസംഘവും നിക്ഷേപത്തില്‍നിന്നു പണമെടുത്താണു ശമ്പളം കൊടുക്കുന്നത്‌. നിക്ഷേപകര്‍ക്കു പണം തിരിച്ചുകൊടുക്കാനാവാത്ത സ്ഥിതിയും പലേടത്തുമുണ്ട്‌. അതിനാല്‍ രജിസ്‌ട്രാറുടെ ഉത്തരവ്‌ സ്ഥാപനങ്ങളുടെ നിലനില്‍പിനു ഗുണമാണ്‌. പ്രവര്‍ത്തനശോഷണം വന്നവയുടെ സാമ്പത്തികാടിത്തറ ഉറപ്പിക്കാനും സാമ്പത്തികപുരോഗതി നേടാനും ഇത്തരം നടപടികള്‍ അനിവാര്യമാണെന്ന്‌ അസോസിയേഷന്‍ അഭിപ്രായപ്പെട്ടു.