മസ്റ്ററിങ്: പെന്‍ഷന്‍ബോര്‍ഡ്‌ കോഴിക്കോട്ടും മലപ്പുറത്തും സിറ്റിങ്‌ നടത്തും
സഹകരണപെന്‍ഷന്‍കാരുടെ മസ്റ്ററിങ് ബയോമെട്രിക്കിലേക്കു മാറ്റാന്‍ പെന്‍ഷന്‍കാരുടെ നിശ്ചിത പ്രൊഫോമപ്രകാരമുള്ള വിവരങ്ങള്‍ സ്ഥാപനാധികാരികളില്‍നിന്നു സ്വീകരിക്കാനുള്ള പെന്‍ഷന്‍ബോര്‍ഡിന്റെ സിറ്റിങ്ങിന്റെ കോഴിക്കോട്‌, മലപ്പുറം ജില്ലകളിലെ തിയതികളായി. കോഴിക്കോട്‌ ജില്ലയിലെ സിറ്റിങ്‌ 18നും 19നും മലപ്പുറം ജില്ലയിലെത്‌ 20നും 20നും നടക്കും. 18നു ചോറോട്‌ സര്‍വീസ്‌ സഹകരണബാങ്ക്‌ ഹാളിലും 19നു കേരളബാങ്ക്‌ ഹാളിലുമാണു കോഴിക്കോട്‌ ജില്ലയിലെ സിറ്റിങ്‌. മലപ്പുറം ജില്ലയിലെ സിറ്റിങ്‌ 20നു മലപ്പുറം കേരളബാങ്ക്‌ ഹാളിലും 21നു തിരൂര്‍ അര്‍ബന്‍ സഹകരണബാങ്ക്‌ ഹാളിലുമാണ്‌.
മസ്റ്ററിങ് ബുദ്ധിമുട്ടകള്‍ പരിഹരിക്കാന്‍ ലൈഫ്‌ സര്‍ട്ടിഫിക്കറ്റ്‌ ജീവന്‍രേഖ വഴിയാണു പ്രൊഫോമ പ്രകാരം വിവരങ്ങള്‍ ശേഖരിക്കുന്ത്‌. പെന്‍ഷന്‍ബോര്‍ഡ്‌ തയ്യാറാക്കിയ പ്രൊഫോമയോടൊപ്പം ആധാറിന്റെ സ്വയം സാക്ഷ്യപ്പെടുത്തിയ പകര്‍പ്പും ഉള്‍പ്പെടുത്തിയാണു രേഖകള്‍ സമര്‍പ്പിക്കേണ്ടത്‌. പെന്‍ഷന്‍കാര്‍ സേവനമനുഷ്‌ഠിച്ചിരുന്ന ബാങ്ക്‌/സംഘം രേഖകള്‍ ശേഖരിക്കുകയും ചീഫ്‌ എക്‌സിക്യൂട്ടീവ്‌ ഓഫീസര്‍/കേരളബാങ്ക്‌ മാനേജര്‍/ ഗസറ്റഡ്‌ ഓഫീസര്‍ സാക്ഷ്യപ്പെടുത്തുകയും ചെയ്യുന്ന രേഖകള്‍ ജില്ലകളില്‍ സിറ്റിങ്‌ നടക്കുന്ന കേന്ദ്രങ്ങളില്‍ എത്തിക്കണമെന്നു പെന്‍ഷന്‍ബോര്‍ഡ്‌ അഡീഷണല്‍ രജിസ്‌ട്രാര്‍/സെക്രട്ടറി അറിയിച്ചു.
