ഇരിങ്ങാലക്കുട ടൗണ്‍സഹകരണബാങ്കിന്‌ റിസര്‍വ്‌ ബാങ്ക് അഡ്‌മിനിസ്‌ട്രേറ്ററെ വച്ചു
പ്രതിസന്ധിയെത്തുടര്‍ന്ന്‌ റിസര്‍വ്‌ബാങ്ക്‌ നടപടിക്കു വിധേയമായ അര്‍ബന്‍ സഹകരണബാങ്കായ ഇരിങ്ങാലക്കുട ടൗണ്‍ സഹകരണബാങ്കിനു റിസര്‍വ്‌ അഡ്‌മിനിസ്‌ട്രേറ്ററെ നിയമിച്ചു. ഫെഡറല്‍ ബാങ്ക് മുന്‍വൈസ്‌ചെയര്‍മാന്‍ രാജു എസ്‌ നായരാണ്‌ അഡ്‌മിനിസ്‌ട്രേറ്റര്‍. അദ്ദേഹത്തെ സഹായിക്കാന്‍ ഉപദേഷ്ടാക്കളുടെ സമിതിയും രൂപവല്‍കരിച്ചിട്ടുണ്ട്‌. സൗത്ത്‌ ഇന്ത്യന്‍ ബാങ്ക് മുന്‍ ഡെപ്യൂട്ടി ജനറല്‍ മാനേജര്‍ മോഹനന്‍ കെ, ഫെഡറല്‍ ബാങ്ക് മുന്‍ വൈസ്‌പ്രസിഡന്റ്‌ ടി.എ. മുഹമ്മദ്‌ സഗീര്‍ എന്നിവരാണ്‌ ഉപദേശകസമിതിയംഗങ്ങള്‍. സാമ്പത്തികനില മോശമായതിനെത്തുടര്‍ന്നാണു റിസര്‍വ്‌ ബാങ്ക് നടപടിയെടുത്തത്‌. ജൂലൈ 30നായിരുന്നു നടപടി. റിസര്‍വ്‌ ബാങ്കിന്റെ മുന്‍കൂര്‍ അനുമതി കൂടാതെ വായ്‌പകള്‍ നല്‍കുകയോ നിക്ഷേപം നടത്തുകയോ നിക്ഷേപം സ്വീകരിക്കുകയോ പേമെന്റ്‌ നല്‍കുകയോ ഒക്കെ ചെയ്യുന്നതിനാണു നിയന്ത്രണം. സേവിങ്‌സ്‌ അടക്കമുള്ള അക്കൗണ്ടുകളില്‍നിന്നു വ്യവസ്ഥകള്‍ക്കു വിധേയമായി 10,000 രൂപ വരെ നിക്ഷേപകര്‍ക്കു പിന്‍വലിക്കാന്‍ വ്യവസ്ഥകള്‍ക്കു വിധേയമായി അനുവദിച്ചിരുന്നു. നിക്ഷേപഇന്‍ഷുറന്‍സ്‌ വായ്‌പാ ഗ്യാരന്റി കോര്‍പറേഷനില്‍നിന്ന്‌ (ഡിഐസിജിസി) അഞ്ചുലക്ഷംരൂപവരെയുള്ള നിക്ഷേപത്തിന്‌ സംരക്ഷണമുണ്ട്‌. അഞ്ചുലക്ഷംരൂപവരെയുള്ള നികക്ഷേപം ലഭിക്കുന്നതിന്‌ അപേക്ഷ നല്‍കുന്നതിനു സെപ്‌റ്റംബര്‍ 13 വരെ നിക്ഷേപകര്‍ക്കു സമയം അനുവദിച്ചിരുന്നു. ഒക്ടോബര്‍ 28ന് ഡിഐസിജിസിയില്‍നിന്ന്‌ ഈ തുക നിക്ഷേപകര്‍ക്കു ലഭിക്കുമെന്നു പ്രതീക്ഷിക്കപ്പെടുന്നു.
