യുവജന സംഘങ്ങളില്‍ പുത്തന്‍ ലുക്കില്‍ AYCOOPS
– ദീപ്തി വിപിന്‍ലാല്‍
കേരളത്തിലെ ആദ്യത്തെ കോ-ഓപ്പറേറ്റീവ് മീഡിയ പ്രൊഡക്ഷന്‍ ഹൗസായ
അയ്കൂപ്സ് പുനലൂരില്‍ പ്രവര്‍ത്തനമാരംഭിച്ചു. ജേര്‍ണലിസവും
പബ്ലിക് റിലേഷനും അഡ്വര്‍ടൈസ്മെന്റും മീഡിയ മാനേജ്മെന്റും
സഹകരണവും ഒക്കെ ചേര്‍ത്തിട്ടുള്ള ഈ സംഘത്തില്‍ ഫോട്ടോഗ്രാഫര്‍മാര്‍,
വീഡിയോഗ്രാഫര്‍മാര്‍, ഗ്രാഫിക് ഡിസൈനര്‍മാര്‍, കണ്ടന്റ് റൈറ്റര്‍മാര്‍,
എഡിറ്റര്‍മാര്‍, സംഗീതജ്ഞര്‍, സംവിധായകര്‍, സൗണ്ട് എന്‍ജിനിയര്‍മാര്‍,
കലാസംവിധായകര്‍, ശില്‍പ്പികള്‍ എന്നിവരുള്‍പ്പെടുന്നു.
സഹകരണ മേഖലയിലേക്കുളള പുതിയ തലമുറയുടെ കടന്നുവരവ് പുത്തന്‍ ആശയങ്ങളുമായാണ്. അത്തരത്തില്‍ ആരംഭിച്ച ഒരു യുവ സഹകരണ സംഘമാണു കേരളത്തിലെത്തന്നെ ആദ്യത്തെ വീഡിയോ, ഓഡിയോ, പ്രിന്റ് പ്രൊഡക്ഷന്‍ യുവ സഹകരണ സംഘമായ ആര്‍ട്ടിസ്റ്റ് വെല്‍ഫെയര്‍ യുവ സഹകരണ സംഘം ( AYCOOPS ).
കൊല്ലം ജില്ലയിലെ പുനലൂര്‍ എം.എല്‍.എ. റോഡില്‍ പ്രവര്‍ത്തനമാരംഭിച്ച ഈ വ്യത്യസ്തമായ യുവ സഹകരണ സംഘം കുറഞ്ഞ സമയം കൊണ്ടുതന്നെ ശ്രദ്ധിക്കപ്പെട്ടുകഴിഞ്ഞു. പുനലൂര്‍ പത്തനാപുരം പ്രവര്‍ത്തനപരിധിയായുള്ള സംഘത്തില്‍ 51 അംഗങ്ങളാണുള്ളത്. പ്രവര്‍ത്തനങ്ങള്‍ മാത്രമല്ല അയ്കൂപ്സിന്റെ ഓഫീസും ഏറെ വ്യത്യസ്തയുള്ളതാണ്. കാഴ്ചക്കാരില്‍ കൗതുകമുണര്‍ത്തുന്ന ഒരുപാട് സംഗതികളുണ്ട് അവിടെ കാണാന്‍. പതിവ് ഓഫീസ് സങ്കല്‍പങ്ങളെ ഇവര്‍ മാറ്റിമറിച്ചിരിക്കുന്നു. കടന്നുചെല്ലുന്നിടത്തു തൂക്കിയിട്ട വലിയ ബോര്‍ഡോ പ്രസിഡന്റിന്റെ കാബിനോ കറങ്ങുന്ന കസേരയോ ഫയലുകള്‍ നിരത്തിയിട്ട സെക്രട്ടറിയുടെ മേശയോ ഒന്നും കാണാനാവില്ല. പകരം, കയറിച്ചെല്ലുമ്പോള്‍ ആദ്യം കാണുന്നതു പ്രസിഡന്റിന്റെ ലോറിയായിരിക്കും. പിന്നെ സെക്രട്ടറിയുടെ പിക്കപ്പ് വാന്‍, എഡിറ്ററുടെ സ്‌കൂട്ടര്‍ എന്നിങ്ങനെയുളള കാഴ്ച. ഇതെല്ലാം ഓരോ കാബിനാണ് എന്നതാണ് ഏറ്റവും കൗതുകം.
പ്രസിഡന്റ്
ലോറിയില്‍
പ്രസിഡന്റ് തീരുമാനങ്ങളെടുക്കുന്നതു ലോറിയിലിരുന്നാണ്. സെക്രട്ടറി പുസ്തകങ്ങളും രേഖകളും പരിശോധിക്കുന്നതു പിക്കപ്പിനുള്ളിലിരുന്നാണ്. എഡിറ്റിങ്ങും ഡിസൈനിങ്ങുമാകട്ടെ സ്‌കൂട്ടറിലിരുന്നും. പുനലൂര്‍ സ്വദേശിയായ മുഹമ്മദ് ഷാഫിയുടെ മനസ്സില്‍ ഉരുത്തിരിഞ്ഞുവന്ന ആശയമാണ് ഈ സംരംഭത്തിനു പിന്നില്‍. ഇവിടത്തെ പുതുമ അവസാനിക്കുന്നില്ല. പരമ്പ് ഉപയോഗിച്ച് തയാറാക്കിയ പ്ലാറ്റ്ഫോമിലാണു സൊസൈറ്റിയുടെ പേര് ഡിസൈന്‍ ചെയ്തിരിക്കുന്നത്. ഫ്രിഡ്ജുകള്‍ക്കു രൂപമാറ്റം വരുത്തി അലമാരയും ഇരിപ്പിടവും തയാറാക്കിയിരിക്കുന്നു. മീന്‍ പിടിക്കാന്‍ ഉപയോഗിക്കുന്ന ഒറ്റാല്‍ കൊണ്ടാണു ടീപ്പോയിയും പത്രം സ്റ്റാന്റും നിര്‍മിച്ചിരിക്കുന്നത്. സൈക്കിളിന്റെ വീലില്‍ സൊസൈറ്റിയുടെ സേവനങ്ങള്‍ ചക്രരൂപത്തിലാക്കി ഡിസൈന്‍ ചെയ്തിരിക്കുന്നു. തക്കാളിപ്പെട്ടിയില്‍ നിര്‍മിച്ച സേവന ബോര്‍ഡുകളും ഇതിനുള്ളിലുണ്ട്. കൂടുതല്‍ മോടി കൂട്ടാനായി പഴയ റാന്തല്‍ വിളക്കും ചുവരില്‍ തൂക്കിയിട്ടുണ്ട്. അതിനെല്ലാം പുറമെ ഓഫീസിനു മുമ്പിലായി രണ്ടു സൈക്കിളുകളുണ്ട്. ഒന്ന് വ്യായാമം ചെയ്യാനായി ഉപയോഗിക്കാം. മറ്റേത് പ്രസിഡന്റിന്റെ ബോര്‍ഡ് തൂക്കിയതാണ്. പെട്രോളിനു വിലകൂടിയതില്‍പ്പിന്നെ ഇതിലാണു പ്രസിഡന്റ് ഷാഫിയുടെ യാത്ര. സംഘത്തിന്റെ പ്രവര്‍ത്തനത്തില്‍ പുതുമ വേണമെന്ന ആഗ്രഹമാണു സംഘത്തിന്റെ ഓഫീസിലെ ഇന്റീരിയറുകളില്‍ ഇത്തരത്തില്‍ മാറ്റം വരുത്താന്‍ തങ്ങളെ പ്രേരിപ്പിച്ചതെന്നു പ്രസിഡന്റ് മുഹമ്മദ് ഷാഫി പറയുന്നു. കൂടാതെ, ആക്രി വസ്തുക്കളുടെ പുനരുപയോഗമെന്ന ചിന്തയും ഇതിനു കാരണമായി.
സര്‍ക്കാരിന്റെ നൂറുദിന കര്‍മപദ്ധതിയില്‍പ്പെടുത്തിയാണു സംഘം രൂപവത്കരിച്ചിരിക്കുന്നത്. 2021 ഡിസംബര്‍ രണ്ടിനു സഹകരണ വകുപ്പ് മന്ത്രി വി.എന്‍. വാസവനാണ് അയ്കൂപ്സ് ഉദ്ഘാടനം ചെയ്തത്. ഓഫീസിന്റെ വ്യത്യസ്തത കൊണ്ടുതന്നെ മാധ്യമങ്ങള്‍ക്കിടയിലും ജനങ്ങള്‍ക്കിടയിലും അയ്കൂപ്സ് ഏറെ ശ്രദ്ധ നേടിയിരുന്നു. പരമ്പരാഗത സഹകരണ സംഘങ്ങളില്‍നിന്നു വ്യത്യസ്തമായി സ്റ്റാര്‍ട്ടപ്പായാണു പ്രവര്‍ത്തനം. ഷെയര്‍, ഡെപ്പോസിറ്റ് സമ്പ്രദായമാണു പിന്തുടരുന്നത്. അംഗങ്ങളെല്ലാവരും പ്രൊഫഷണലുകളാണ്. ഫോട്ടോഗ്രാഫര്‍മാര്‍, വീഡിയോഗ്രാഫര്‍മാര്‍, ഗ്രാഫിക് ഡിസൈനര്‍മാര്‍, കണ്ടന്റ് റൈറ്റര്‍മാര്‍, എഡിറ്റര്‍മാര്‍, സംഗീതജ്ഞര്‍, സംവിധായകര്‍, സൗണ്ട് എന്‍ജിനിയര്‍മാര്‍, കലാസംവിധായകര്‍, ശില്‍പ്പികള്‍ എന്നിവരാണ് അംഗങ്ങളിലധികവും. പരസ്യചിത്ര നിര്‍മാണം, വിവാഹ ആല്‍ബം, അവാര്‍ഡ്‌നെറ്റ്, ഡോക്യൂമെന്ററി, ഡോക്യൂഫിക്ഷന്‍, മ്യൂസിക്കല്‍ ആല്‍ബം, പ്രോഡക്റ്റ് എക്സ്പ്ലെയിനര്‍, അനൗണ്‍സ്മെന്റ്, പ്രിന്റ് കണ്ടന്റ് റൈറ്റിംഗ്, പരിഭാഷ തുടങ്ങിയ ജോലികളാണു സംഘം ചെയ്യുന്നത്. സഞ്ചാരം എന്ന പേരില്‍ മാഗസിനും അയ്കൂപ്സ് പുറത്തിറക്കിയിട്ടുണ്ട്.
മാധ്യമ പ്രവര്‍ത്തനത്തിലും ക്രിയേറ്റീവ് റൈറ്റിംഗിലും 14 വര്‍ഷം പ്രവര്‍ത്തന പരിചയമുള്ള ഷാഫിയുടെ മനസ്സില്‍ 2017 ല്‍ കടന്നു കൂടിയ
ആശയമാണ് ആര്‍ട്ടിസ്റ്റ് വെല്‍ഫെയര്‍ യുവ സഹകരണ സംഘം. കേരളത്തിലെ ആദ്യത്തെ കോ-ഓപ്പറേറ്റീവ് മീഡിയ പ്രൊഡക്ഷന്‍ ഹൗസ്. ജേര്‍ണലിസവും പബ്ലിക് റിലേഷനും അഡ്വര്‍ടൈസ്മെന്റും മീഡിയ മാനേജ്മെന്റും സഹകരണവും ഒക്കെ ചേര്‍ത്തൊരു സംഗതി. ഒരുപാട് പേര്‍ക്കു തൊഴില്‍ ലഭിക്കാന്‍ പോകുന്ന ഒരു സ്റ്റാര്‍ട്ടപ്പ് സഹകരണ സംഘം. എന്നാല്‍, അതു പൂര്‍ണ്ണതയിലെത്താന്‍ സമയെമെടുത്തു. പ്രതിസന്ധികള്‍ പലതും മറികടന്നു. ഒടുവില്‍ 2021 ല്‍ അയ്കൂപ്സ് യാഥാര്‍ഥ്യമായി. കലാ മേഖലയില്‍ പൂര്‍ണമായും പ്രവര്‍ത്തിക്കുന്ന സുഹൃത്തുക്കളും ഒപ്പം കൂടിയപ്പോള്‍ കേരളത്തിലെ വീഡിയോ, ഓഡിയോ, പ്രിന്റ് പ്രൊഡക്ഷന്‍ യുവ സഹകരണ സംഘം പുനലൂരില്‍ പ്രവര്‍ത്തനം തുടങ്ങി. അറിഞ്ഞതും അറിയാത്തതുമായ കലാം, ആ ചൂളം വിളികളില്‍ മുഴങ്ങിക്കേട്ടത്, സദ്ദാം ഹുസൈന്‍ എന്നീ മൂന്നു പുസ്തകങ്ങളുടെ രചയിതാവാണു ഷാഫി.
എക്സ്പോയില്
തിളങ്ങി അയ്കൂപ്സ്
ഇക്കഴിഞ്ഞ ഏപ്രിലില്‍ എറണാകുളത്തു നടന്ന സഹകരണ എക്സ്പോ – 2022 ന്റെ മീഡിയ പബ്ലിക് റിലേഷന്‍ ഡോക്യൂമെന്ററികളും പ്രൊമോ വീഡിയോകളും അയ്കൂപ്സാണു നിര്‍മിച്ചത്. സമൂഹമാധ്യമങ്ങളില്‍ സഹകരണ എക്സ്പോയുടെ പ്രൊമോ വീഡിയോകള്‍ വൈറലായിരുന്നു. അയ്കൂപ്സ് ഭാരവാഹികളും ഓഹരിയുടമകളുമാണു വീഡിയോയില്‍ അഭിനയിച്ചത്. സംഘം പ്രസിഡന്റ് പി. മുഹമ്മദ് ഷാഫി സൈക്കിളില്‍ സഹകരണ എക്സ്പോയുടെ പ്രചാരണം നടത്തിയപ്പോള്‍ സെക്രട്ടറി എം. നിനേഷ് തെങ്ങുകയറ്റക്കാരനായാണു പ്രചാരണം നടത്തിയത്. മീശമാധവനിലെ നര്‍മരംഗം പുനരാവിഷ്‌കരിച്ചും ഫുട്ബാളിന്റെ പശ്ചാത്തലത്തിലും ആകര്‍ഷകമായ രീതിയിലാണു വീഡിയോകള്‍ ചിത്രീകരിച്ചിരിക്കുന്നത്. വീഡിയോകള്‍ വൈറലായതോടെ സഹകരണ എക്സ്പോയില് അയ്കൂപ്സ് ഒരുക്കിയ മീഡിയ റൂം കാണാന്‍ നിരവധി പേരാണെത്തിയത്.
ദിവസേന പുറത്തിറങ്ങിയ ടാബ്ലോയ്ഡിനു എക്സ്പോയില് വലിയ സ്വീകാര്യതയാണു ലഭിച്ചത്. എക്സ്പോയിലെത്തിയ മന്ത്രിമാരുടെ അഭിമുഖങ്ങള്‍, സെലിബ്രിറ്റീസ് ചാറ്റ് ഷോ തുടങ്ങിയവ എക്സ്പോയുടെ പ്രധാന ആകര്‍ഷണമായിരുന്നു. സ്റ്റാളുകളുടെ പ്രത്യേക സ്റ്റോറികള്‍ മുഴുവന്‍ സമയവും സംപ്രേക്ഷണം ചെയ്തിരുന്നു. ഇതിനോടൊപ്പം ഒരു സ്റ്റുഡിയോ ഫ്ളോറും ഇവര്‍ തയാറാക്കിയിരുന്നു. റിപ്പോര്‍ട്ടര്‍, കണ്ടന്റ് എഡിറ്റര്‍, വിഷ്വല്‍ എഡിറ്റര്‍, ഡിസൈനര്‍, വിഷ്വല്‍ ക്യാമറാമാന്‍, ഫോട്ടോഗ്രാഫര്‍ തുടങ്ങി സംഘത്തിലെ 18 സഹകാരികളാണ് എക്സ്പോയിലെ മീഡിയ റൂം നിയന്ത്രിച്ചത്.
മ്യൂസിക് ബാന്‍ഡ്, കോമഡി ബാന്‍ഡ് എന്നിവ ആരംഭിക്കാന്‍ സംഘത്തിനു പരിപാടിയുണ്ടെന്നു പ്രസിഡന്റ് മുഹമ്മദ് ഷാഫി പറഞ്ഞു. കൂടാതെ ഒരു സാറ്റ്‌ലൈറ്റ് ചാനല്‍ തുടങ്ങാനുള്ള ഒരുക്കങ്ങളും അണിയറയില്‍ നടക്കുന്നുണ്ട്.
നൗഫല്‍ ഷാ കരീം വൈസ് പ്രസിഡന്റായുള്ള സംഘം ഭരണസമിതിയില്‍ ഷബാന ബീവി, അന്‍സിയ കരിം, സ്മിത വി, കൃഷ്ണകുമാര്‍.എസ്, ലിനോ റെജി, അഭിമോന്‍ ഒ.എസ് എന്നിവര്‍ അംഗങ്ങളാണ്.