കേരള സ്റ്റേറ്റ് ഹാന്‍ഡ്‌ലൂം വീവേഴ്‌സ് കോ-ഓപ്പറേറ്റീവ് സൊസൈറ്റി ( HANTEX )
പി.വി. രാജേഷ്, കരിപ്പാല്‍
2020 ഫെബ്രുവരി ലക്കം
കേരളത്തിലെ എല്ലാ പ്രാഥമിക കൈത്തറി സൊസൈറ്റികളുടെയും പരമോന്നത സംഘമാണ് കേരള സ്റ്റേറ്റ് ഹാന്‍ഡ്‌ലൂം വീവേഴ്‌സ് കോ-ഓപ്പറേറ്റീവ് സൊസൈറ്റി. 1960-ലെ കേരള കൈത്തറി നെയ്ത്തുതൊഴിലാളി സഹകരണ സംഘം ( സ്‌പെഷ്യല്‍ പ്രൊവിഷന്‍ ) നിയമപ്രകാരം 1961 ല്‍ തിരുവനന്തപുരം ആസ്ഥാനമാക്കിയാണ് ഈ സൊസൈറ്റി രൂപവത്കരിച്ചത്. തിരുവനന്തപുരത്ത് പ്രവര്‍ത്തിക്കുന്ന തിരുവിതാംകൂര്‍ ശ്രീമൂലം ഹാന്‍ഡ്‌ലൂം വീവേഴ്‌സ് കോ-ഓപ്പറേറ്റീവ് സൊസൈറ്റി, തൃശ്ശൂരിലെ കൊച്ചിന്‍ സെന്‍ട്രല്‍ ഹാന്‍ഡ്‌ലൂം വീവേഴ്‌സ് കോ-ഓപ്പറേറ്റീവ് സൊസൈറ്റി , കോഴിക്കോട്ടെ കേരള ഹാന്‍ഡ്‌ലൂം വീവേഴ്‌സ് കോ-ഓപ്പറേറ്റീവ് എന്നീ മൂന്നു സെന്‍ട്രല്‍ സൊസൈറ്റികളെ സംയോജിപ്പിച്ചാണ് ഹാന്റക്‌സ് സ്ഥാപിച്ചത്. ഇതില്‍ സംസ്ഥാന സര്‍ക്കാരിന് അംഗത്വമുണ്ട്. സംസ്ഥാനത്തെ പ്രാഥമിക നെയ്ത്തുതൊഴിലാളി സഹകരണ സംഘങ്ങള്‍ക്കും സഹകരണ നെയ്ത്തുശാലകള്‍ക്കും ഹാന്റക്‌സില്‍ അംഗമാകാവുന്നതാണ്. കൂടാതെ, സംസ്ഥാന സര്‍ക്കാരിനും അംഗത്വമുണ്ട്.
കൈത്തറി വ്യവസായത്തിന് വാണിജ്യപരമായി ഒരു അടിസ്ഥാനമുണ്ടാക്കുക എന്ന ലക്ഷ്യത്തോടെ നെയ്ത്തുകാരില്‍ നിന്നു കൈത്തറി ഉല്‍പ്പന്നങ്ങള്‍ ശേഖരിക്കുകയും അതിന് കേരളത്തിന് അകത്തും പുറത്തുമായി വിപണി കണ്ടെത്തുകയും ചെയ്യുന്നുണ്ട് ഹാന്റക്‌സ്. ഓണം, വിഷു, ക്രിസ്തുമസ് തുടങ്ങിയ ഉത്സവ സീസണുകളില്‍ സംസ്ഥാനത്തെ പ്രധാന നഗരങ്ങളില്‍ കൈത്തറി ഉല്‍പ്പന്നങ്ങളുടെ വാണിജ്യ മേളകളും പ്രദര്‍ശനങ്ങളും നടത്തുന്നു. കൈത്തറി വ്യവസായത്തിലെ പുതിയ സാങ്കേതികവിദ്യകളില്‍ നെയ്ത്തുകാര്‍ക്ക് പരിശീലനം നല്‍കുന്നു. കൈത്തറി വ്യവസായത്തിന്റെയും മറ്റ് അനുബന്ധ വിഷയങ്ങളുടെയും വികസനത്തിനാവശ്യമായ പ്രചാരണവും ഹാന്റക്‌സ് ചെയ്തുവരുന്നു.
ഇന്ത്യന്‍ ഫാര്‍മേഴ്‌സ് ഫെര്‍ട്ടിലൈസര്‍ കോ-ഓപ്പറേറ്റീവ് ലിമിറ്റഡ് ( IFFCO )
ഇന്ത്യയിലെ ഏറ്റവും വലിയ രാസവള നിര്‍മാണക്കമ്പനിയാണ് ഇന്ത്യന്‍ ഫാര്‍മേഴ്‌സ് ഫെര്‍ട്ടിലൈസര്‍ കോ-ഓപ്പറേറ്റീവ് ലിമിറ്റഡ് . 1967 നവംബര്‍ മൂന്നിന് മള്‍ട്ടി സ്റ്റേറ്റ് കോ-ഓപ്പറേറ്റീവ് സൊസൈറ്റീസ് ആക്ട് പ്രകാരം രജിസ്റ്റര്‍ ചെയ്ത ഇഫ്‌കോയുടെ ആസ്ഥാനം ന്യൂഡല്‍ഹിയാണ്. രാസവളങ്ങള്‍, അനുബന്ധ ഉല്‍പ്പന്നങ്ങള്‍, ഉപോല്‍പ്പന്നങ്ങള്‍ എന്നിവയുടെ നിര്‍മാണം ഏറ്റെടുക്കുന്നതിലൂടെയും അവയുടെ പരിവര്‍ത്തനം, സംഭരണം, വിപണനം എന്നിവയിലൂടെയും അംഗങ്ങളുടെ സാമ്പത്തിക ഉന്നമനമാണ് ഇഫ്‌കോ ലക്ഷ്യമിടുന്നത്. ഇന്ത്യ മുഴുവന്‍ പ്രവര്‍ത്തനമേഖലയായി വരുന്ന ഇഫ്‌കോയില്‍ ദേശീയ തലത്തിലുള്ള എല്ലാ കാര്‍ഷിക വായ്പാ, വിപണന, സംസ്‌കരണ, വിതരണ സംഘങ്ങളുടെയും സഹകരണ ഫെഡറേഷനുകള്‍ അംഗങ്ങളാണ്.
ഗുജറാത്തിലെ കലോള്‍, കണ്ട്‌ല എന്നിവിടങ്ങളിലും ഉത്തര്‍പ്രദേശിലെ ഫുല്‍പൂരിലും ഒഡീഷയിലെ പാരാദീപിലും ഇഫ്‌കോയുടെ രാസവള നിലയങ്ങള്‍ പ്രവര്‍ത്തിക്കുന്നു. ഇവിടെ ഉല്‍പ്പാദിപ്പിക്കുന്ന രാസവളം ഗ്രാമങ്ങളിലെ കര്‍ഷകരിലേക്ക് എത്തിക്കുന്നതിനും അവ എങ്ങനെ ഫലപ്രദമായി ഉപയോഗിക്കണമെന്ന് കര്‍ഷകരെ ബോധവത്കരിക്കുന്നതിനും വേണ്ടി ഉയര്‍ന്ന പരിശീലനം നേടിയ കാര്‍ഷിക ബിരുദധാരികളെ നിയോഗിച്ചിട്ടുണ്ട്. മാതൃകാ കാര്‍ഷിക ഗ്രാമങ്ങളുടെ വികസനത്തിനായി ഇഫ്‌കോയുടെ നിര്‍ദേശ പ്രകാരം സമതുലിതമായ വളപ്രയോഗങ്ങള്‍ സ്വീകരിക്കുന്ന ‘ ഇഫ്‌കോ വില്ലേജുകള്‍ ‘ ക്ക് രൂപം നല്‍കി. കൂടാതെ വെള്ളപ്പൊക്കം, ഭൂകമ്പം, ചുഴലിക്കാറ്റ്, തീ, വരള്‍ച്ച തുടങ്ങിയ പ്രകൃതി ദുരന്തങ്ങള്‍ക്ക് ഇരയാകുന്നവര്‍ക്ക് ആശ്വാസവും പുനരധിവാസവും നല്‍കുന്നതിനായി ‘ കിസാന്‍ സേവാ ഫണ്ട് ‘ എന്ന പേരില്‍ ചാരിറ്റബിള്‍ ട്രസ്റ്റും രൂപവത്കരിച്ചു.
നാഷണല്‍ അഗ്രിക്കള്‍ച്ചറല്‍ കോ-ഓപ്പറേറ്റീവ് മാര്‍ക്കറ്റിങ് ഫെഡറേഷന്‍ ( NAFED )
ഇന്ത്യയില്‍ സഹകരണ വിപണനം പരിപോഷിപ്പിക്കുന്നതിലും പരിരക്ഷിക്കുന്നതിലും പ്രധാന പങ്കു വഹിക്കുന്ന ദേശീയ തലത്തിലുള്ള ഫെഡറേഷനാണ് നാഷണല്‍ അഗ്രിക്കള്‍ച്ചറല്‍ കോ-ഓപ്പറേറ്റീവ് മാര്‍ക്കറ്റിങ് ഫെഡറേഷന്‍ ( NAFED ). 1958 ല്‍ ന്യൂഡല്‍ഹി ആസ്ഥാനമായി പ്രാബല്യത്തില്‍ വന്നു.
പ്രാഥമിക സഹകരണ വിപണന ഫെഡറേഷനുകളുടെയും സംസ്ഥാന വിപണന ഫെഡറേഷനുകളുടെയും പ്രതിനിധികളാണ് നാഫെഡിനെ നിയന്ത്രിക്കുന്നത്. ആഭ്യന്തര വ്യാപാരത്തിനും കയറ്റുമതി വിപണിക്കും സഹകരണ വിപണന സജ്ജീകരണത്തില്‍ ഒരു കോര്‍ഡിനേറ്ററായി പ്രവര്‍ത്തിക്കുന്നു. നാഫെഡ് അതിന്റെ ശാഖകളിലൂടെയും സംസ്ഥാന, പ്രാഥമിക തലങ്ങളിലുള്ള സഹകരണ വിപണന സംഘങ്ങളിലൂടെയും കാര്‍ഷിക, മൃഗസംരക്ഷണ ഉല്‍പ്പന്നങ്ങളുടെ ശേഖരണം, സംഭരണം, വിപണനം, സംസ്‌കരണം എന്നിവ ഏറ്റെടുക്കുന്നു. ഉല്‍പ്പാദകരുടെയും ഉപഭോക്താക്കളുടെയും താല്‍പ്പര്യങ്ങള്‍ സംരക്ഷിക്കുന്നതിനായി നാഫെഡ് വൈവിധ്യമാര്‍ന്ന പ്രവര്‍ത്തനങ്ങള്‍ നടത്തുന്നു. ഗവണ്‍മെന്റിന്റെ ഒരു ഏജന്റ് എന്ന നിലയില്‍, കാര്‍ഷിക ഉല്‍പ്പന്നങ്ങളുടെ വില സുസ്ഥിരമാക്കുന്നതില്‍ നാഫെഡ് പങ്ക് വഹിക്കുകയും ഫലപ്രദമായ വിതരണ മാര്‍ഗത്തിലൂടെ ആവശ്യവസ്തുക്കള്‍ വിതരണം ചെയ്യാന്‍ ശ്രമിക്കുകയും ചെയ്യുന്നു. എന്‍.സി.ഡി.സി. യുടെ സാമ്പത്തിക സഹായത്തോടെ പഴം-പച്ചക്കറി സംസ്‌കരണ യൂണിറ്റുകള്‍, കോള്‍ഡ് സ്‌റ്റോറേജുകള്‍, ഗോഡൗണുകള്‍ എന്നിവയും നാഫെഡ് സ്ഥാപിച്ചിട്ടുണ്ട്. സംസ്ഥാനതല ഫെഡറേഷനുകള്‍ ശേഖരിക്കുന്ന കാര്‍ഷികോല്‍പ്പന്നങ്ങളുടെ കയറ്റുമതി ഏറ്റെടുക്കുന്നതിനുള്ള സര്‍ക്കാരിന്റെ പൈലറ്റിംഗ് ഏജന്‍സിയാണിത്.
സഹകരണം കടന്നുചെല്ലാത്ത അവികസിത പ്രദേശങ്ങളില്‍ നാഫെഡ് അതിന്റെ പ്രവര്‍ത്തനങ്ങള്‍ വിപുലീകരിക്കുകയും ആദിവാസി മേഖലകളിലെ സഹകരണത്തിന് മാര്‍ഗനിര്‍ദേശം നല്‍കുന്നതിനായി ഒരു സ്‌പെഷ്യല്‍ സെല്‍ സ്ഥാപിക്കുകയും ചെയ്തിട്ടുണ്ട്. ആഭ്യന്തര വ്യാപാരം, പ്രാദേശിക അസന്തുലിതാവസ്ഥ നീക്കം ചെയ്യല്‍, സംഭരണത്തിന്റെയും സംസ്‌കരണത്തിന്റെയും വ്യാപനം, പരിശീലന പരിപാടികളുടെ വികസനം എന്നിവ നാഫെഡ് ഏറ്റെടുത്തു നടത്തുന്നു.
കൃഷക് ഭാരത് കോ-ഓപ്പറേറ്റീവ് സൊസൈറ്റി ലിമിറ്റഡ് ( KRIBHCO )
1980 ഏപ്രില്‍ 17ന് രൂപവത്കരിച്ച മള്‍ട്ടി സ്റ്റേറ്റ് കോ-ഓപ്പറേറ്റീവ് സൊസൈറ്റിയാണ് കൃഷക്് ഭാരത് കോ-ഓപ്പറേറ്റീവ് സൊസൈറ്റി ലിമിറ്റഡ് ( KRIBHCO ). യൂറിയയും അമോണിയയും ഉല്‍പ്പാദിപ്പിക്കുന്ന, ലോകത്തെ ഏറ്റവും വലിയ സഹകരണ രാസവള പദ്ധതിയാണ് കൃഷക് ഭാരത് കോ-ഓപ്പറേറ്റീവ് സൊസൈറ്റി . ഗുജറാത്തിലെ ഹാസിറയില്‍ സ്ഥിതി ചെയ്യുന്ന ഒരു വലിയ രാസവള ഉല്‍പ്പാദന സമുച്ചയത്തിന്റെ ഉടമസ്ഥതയിലുള്ള സഹകരണ സംഘമാണ് കൃഷക് ഭാരത് സൊസൈറ്റി. രാജ്യത്തെങ്ങുമുള്ള സഹകരണ സംഘങ്ങളും നിരവധി ധനകാര്യ സ്ഥാപനങ്ങളും ഇതില്‍ അംഗമാണ്.
രാസവളത്തിന്റെ കാര്യത്തില്‍ രാജ്യത്ത് സ്വയംപര്യാപ്തത നേടുക, വളത്തിന്റെ ഇറക്കുമതി കുറച്ചുകൊണ്ട് വിദേശനാണ്യം ലാഭിക്കുക, വരണ്ട പ്രദേശങ്ങളില്‍ വരള്‍ച്ചയെ പ്രതിരോധിക്കുന്ന വിളകളുടെ കൃഷിയും ഈര്‍പ്പം വര്‍ധിപ്പിക്കുന്ന വിദ്യകളും സാങ്കേതികതയും അംഗങ്ങള്‍ക്കിടയില്‍ പ്രചരിപ്പിക്കുക, കാര്‍ഷിക ഉല്‍പ്പാദനം വര്‍ധിപ്പിക്കുക എന്നിവ കൃഷക് ഭാരതിന്റെ പ്രധാനപ്പെട്ട ലക്ഷ്യങ്ങളാണ്. നിരവധി അനുബന്ധ വ്യവസായങ്ങളിലൂടെ ധാരാളം ആളുകള്‍ക്ക് പ്രത്യക്ഷമായും പരോക്ഷമായും തൊഴില്‍ നല്‍കാന്‍ ഈ സ്ഥാപനത്തിന് സാധിക്കുന്നു. രാജ്യത്തിന്റെ വിവിധ ഭാഗങ്ങളിലുള്ള തിരഞ്ഞെടുത്ത ചില ഗ്രാമങ്ങളിലും പിന്നാക്ക ജില്ലകളിലും സമഗ്ര വികസനം എത്തിക്കുക എന്ന ലക്ഷ്യവും ഈ സംഘത്തിനുണ്ട്.
