പാലക്കാട്‌, തൃശ്ശൂര്‍ ജില്ലകളിലെ പെന്‍ഷന്‍ബോര്‍ഡ്‌ സിറ്റിങ്‌ തിയതികളായി
സഹകരണ പെന്‍ഷന്‍കാരുടെ വിവരങ്ങള്‍ ശേഖരിക്കാനുള്ള സഹകരണപെന്‍ഷന്‍ബോര്‍ഡിന്റെ സിറ്റിങ്ങിന്റെ പാലക്കാട്‌, തൃശ്ശൂര്‍ ജില്ലകളിലെ തിയതികള്‍ നിശ്ചയിച്ചു. ഏപ്രില്‍ മൂന്നിനു ഇരിങ്ങാലക്കുട ടൗണ്‍ സര്‍വീസ്‌ സഹകരണബാങ്ക് ഹാളിലും ഏപ്രില്‍ നാലിനു കുന്നംകുളം പഴയബസ്‌ സ്റ്റാന്റിനടുത്തുള്ള കുന്നംകുളം അര്‍ബന്‍ കോഓപ്പറേറ്റീവ്‌ ബാങ്ക് ഹാളിലും ഏപ്രില്‍ അഞ്ചിനു കുറുപ്പം റോഡിലുള്ള കേരളബാങ്ക്‌ തൃശ്ശൂര്‍ ഹാളിലുമാണു തൃശ്ശൂര്‍ ജില്ലയിലെ സിറ്റിങ്‌. ഏപ്രില്‍ ഏഴിനു കേരളബാങ്ക്‌ പാലക്കാട്‌ ഹാളിലും ഏപ്രില്‍ എട്ടിനു എസ്‌ബിഐ ബില്‍ഡിങ്ങിന്റെ രണ്ടാംനിലയിലുള്ള ഒറ്റപ്പാലം സര്‍വീസ്‌ സഹകരണബാങ്ക് ഹാളിലുമാണു പാലക്കാട്‌ ജില്ലയിലെ സിറ്റിങ്‌. എല്ലായിടത്തും രാവിലെ 10മുതല്‍ വൈകുന്നേരം നാലുവരെയാണു സിറ്റിങ്‌. സഹകരണപെന്‍ഷന്‍കാരുടെ ലൈഫ്‌സര്‍ട്ടിഫിക്കറ്റ്‌ സമര്‍പ്പണം സര്‍ക്കാരിന്റെ സാമൂഹ്യസുരക്ഷാപെന്‍ഷന്‍ ബയോമെട്രിക്‌ മസ്‌റ്ററിങ്‌ സംവിധാനമായ ജീവന്‍രേഖ വഴിയാക്കുന്നതിന്റെ ഭാഗമായി സേവന പോര്‍ടല്‍വഴി പെന്‍ഷന്‍കാരുടെ ആധാര്‍നമ്പര്‍, പേര്‌, മേല്‍വിലാസം, പിന്‍കോഡ്‌, പോസ്റ്റോഫീസ്‌ തുടങ്ങിയ വിവരങ്ങള്‍ ശേഖരിക്കാനുള്ള സിറ്റിങ്ങാണിവ. പെന്‍ഷന്‍ബോര്‍ഡ്‌ തയ്യാറാക്കിയ പ്രൊഫോമയോടൊപ്പം ആധാറിന്റെ പകര്‍പ്പും ചേര്‍ത്തുവേണം രേഖകള്‍ സമര്‍പ്പിക്കാന്‍. പെന്‍ഷന്‍കാര്‍ ജോലിചെയ്‌തിരുന്ന ബാങ്ക് അല്ലെങ്കില്‍ സംഘം ഈ രേഖകള്‍ ശേഖരിക്കുകയും ചീഫ്‌എക്‌സിക്യൂട്ടീവോ കേരളബാങ്ക്‌ മാനേജരോ ഗസറ്റഡ്‌ ഓഫീസറോ സാക്ഷ്യപ്പെടുത്തുകയും ചെയ്‌ത രേഖകളാണു പെന്‍ഷന്‍ബോര്‍ഡ്‌ സിറ്റിങ്ങില്‍ ശേഖരിക്കുക. ബാങ്ക് മുഖേന അവ ഹാജരാക്കാന്‍ സാധിക്കാത്തവര്‍ക്കു സിറ്റിങ്‌ നടത്തുന്നയിടത്തു നേരിട്ടോ പ്രതിനിധിമുഖേനയോ ഇവ നല്‍കാം. ഈ രേഖകളൊന്നും പെന്‍ഷന്‍ബോര്‍ഡ്‌ ഓഫീസില്‍ നേരിട്ടു നല്‍കേണ്ടതില്ലെന്നും ബോര്‍ഡ്‌ സെക്രട്ടറി അറിയിച്ചു.
