ആദായ നികുതി നിയമത്തിലെ 194 N – പഠനം
ആദായ നികുതി നിയമത്തിലെ 194 N – പഠനം
ശിവദാസ് ചേറ്റൂരിന്റെ ലേഖനം-2
11. ഇപ്പോൾ 194 (എൻ) വകുപ്പിലെ വ്യവസ്ഥകൾ നമുക്ക് വിശദമായി ചർച്ച ചെയ്യാം. അതിനായി, ധനകാര്യ നിയമം 2020 ലെ 01-07-2020 മുതൽ പ്രാബല്യത്തിൽ വന്ന ഭേദഗതി ചെയ്ത സെക്ഷൻ 194 (എൻ)-ലെ വ്യവസ്ഥകൾ പരിശോധിക്കേണ്ടതായിട്ടുണ്ട്. സെക്ഷൻ 194 (എൻ) ഇപ്രകാരമാണ്:
12. സെക്ഷൻ 194 (എൻ)-ൽ നിന്നും ചില പ്രസക്ത ഭാഗങ്ങൾ:
താഴെപ്പറയുന്ന ഒരു വ്യക്തിയോ/സ്ഥാപനമോ ( person എന്ന പദത്തിന്റെ നിർവചനം section 2(31) നോക്കുക.)
1. ബാങ്കിംഗ് റെഗുലേഷൻ ആക്റ്റ്, 1949 ബാധകമാകുന്ന ഒരു ബാങ്കിംഗ് കമ്പനി
(ആ നിയമത്തിലെ സെക്ഷൻ 51 ൽ പരാമർശിച്ചിരിക്കുന്ന ഏതെങ്കിലും ബാങ്ക് അല്ലെങ്കിൽ ബാങ്കിംഗ് സ്ഥാപനം ഉൾപ്പെടെ);
2. ബാങ്കിംഗ് ബിസിനസ്സ് നടത്തിപ്പിൽ ഏർപ്പെട്ടിരിക്കുന്ന ഒരു സഹകരണ സംഘം;
അല്ലെങ്കിൽ
3. ഒരു പോസ്റ്റ് ഓഫീസ്.
ഏതെങ്കിലും ഒരു വ്യക്തിക്ക് (സ്വീകർത്താവ് എന്ന് ഇവിടെ വിവക്ഷിക്കപ്പെടുന്ന) ഒരു സാമ്പത്തിക വർഷത്തിൽ ഒരെ സമയം ഒരുകോടിയിൽ അധികം രൂപ പണമായി അല്ലെങ്കിൽ ആ വർഷത്തിൽ മൊത്തം ഒരു കോടിയിൽ അധികമോ സ്വീകർത്താവിന്റെ ഒന്നോ അതിലധികമോ അക്കൗണ്ടുകളിൽ നിന്നും പ്രസ്തുത തുക നൽകുന്ന സമയത്ത് അക്കൗണ്ടുകളിൽ നിന്ന് തുക നൽകാൻ ബാധ്യസ്ഥനായ സ്ഥാപനം , ആദായ നികുതിയായി അത്തരം തുകയുടെ രണ്ടു ശതമാനത്തിനു തത്തുല്യമായ തുക ഈടാക്കുന്നതാണ്.
എന്നാൽ, തുക നൽകിയ വർഷത്തിന്റെ തൊട്ടു മുൻപത്തെ വർഷത്തിൽ സെക്ഷൻ 139 സബ് സെക്ഷൻ 1 അനുസരിച്ചുള്ള സമയപരിധി അവസാനിച്ച മൂന്നു മുൻ വർഷങ്ങൾക്ക് പ്രസക്തമായ മൂന്നു നികുതിനിർണയവർഷങ്ങളിൽ നികുതി റിട്ടേൺ സമർപ്പിച്ചിട്ടില്ലാത്ത ഒരു സ്വീകർത്താവിന്റെ കാര്യത്തിൽ ഈ സെക്ഷൻ താഴെപ്പറയുന്ന ഭേദഗതിയോടെ ബാധകമാകും:
(i) സാമ്പത്തിക വർഷം ഇരുപത് ലക്ഷം രൂപയിൽ കൂടുതലുള്ള പണമായി തുകയോ ആകെത്തുകയോ പിൻവലിച്ചാൽ താഴെ പറയുന്ന രീതിയിൽ നികുതി പിടിക്കണം:
(ii) (a) സാമ്പത്തിക വർഷം ഇരുപത് ലക്ഷം രൂപയിൽ കൂടുതലും ഒരു കോടി രൂപയിൽ കവിയാത്തതുമായ, പണമായികൊടുത്ത തുകയോ ആകെത്തുകയോ ആണെങ്കിൽ , ആ തുകയുടെ രണ്ടു ശതമാനത്തിനു തുല്യമായ തുക; അല്ലെങ്കിൽ
(b) സാമ്പത്തിക വർഷം ഒരു കോടി രൂപയിൽ കൂടുതൽ കൊടുത്താൽ , പണമായികൊടുത്ത തുകയോ ആകെത്തുകയോ ആയിരിക്കെ, ആ തുകയുടെ അഞ്ചു ശതമാനത്തിനു തുല്യമായ തുക;
എന്നാൽ, അത്തരം വിജ്ഞാപനത്തിൽ വ്യക്തമാക്കപ്പെട്ട നിബന്ധനകൾ അനുസരിക്കുന്നപക്ഷം അത്തരം സ്വീകർത്താവിനു ഒന്നാമത്തെ വ്യവസ്ഥ ബാധകമാവില്ലെന്നുള്ളതും , അല്ലെങ്കിൽ ചുരുങ്ങിയ നിരക്കിൽ ബാധകം ആവുകയുള്ളുവെന്നും , റീസർവ് ബാങ്കുമായി കൂടിയാലോചിച്ചശേഷം, കേന്ദ്രസർക്കാർ ഔദ്യോഗിക ഗസറ്റിലുള്ള വിജ്ഞാപനം ഇറക്കാവുന്നതാണ്.
മാത്രമല്ല; ഈ സെക്ഷനിൽ അടങ്ങിയിരിക്കുന്ന ഒന്നും തന്നെ താഴെ പറയുന്നവയ്ക്കു ബാധകമാവില്ല:
(i) ഗവണ്മെന്റ് ;
(ii) ഏതെങ്കിലും ഒരു ബാങ്കിങ് കമ്പനി, ബാങ്കിങ് ബിസിനസ്സ് നടത്തുന്ന സഹകരണസംഘം, പോസ്റ്റ് ഓഫീസ്;
(iii) Reserve Bank of India Act, 1934 (2 of 1934) പ്രകാരം റിസർവ് ബാങ്ക് പുറപ്പെടുവിച്ചിട്ടുള്ള മാർഗനിർദ്ദേശങ്ങൾ അനുസരിച്ച് ബിസിനസ്സ് നടത്തുന്നതിൽ ഏർപ്പെട്ടിരിക്കുന്ന ഒരു ബാങ്കിങ് കമ്പനിയുടേയോ ബാങ്കിങ് വ്യവസായത്തിൽ ഏർപ്പെട്ടിരിക്കുന്ന സഹകരണ സംഘത്തിന്റേയോ ഏതെങ്കിലും ബിസിനസ് കറസ്പോണ്ടന്റ് :
(iv) Payment and Settlement Systems Act, 2007 (51 of 2007)പ്രകാരം റിസർവ് ബാങ്ക് അധികാരപ്പെടുത്തിയതനുസരിച്ച് ബിസിനസ്സ് നടത്തുന്നതിൽ ഏർപ്പെട്ടിരിക്കുന്ന ഒരു ബാങ്കിങ് കമ്പനിയുടേയോ ബാങ്കിങ് വ്യവസായത്തിൽ ഏർപ്പെട്ടിരിക്കുന്ന സഹകരണ സംഘത്തിന്റേയോ ഏതെങ്കിലും വൈറ്റ് ലേബൽ ഓട്ടോമേറ്റഡ് ടെല്ലർ മെഷീൻ ഓപ്പറേറ്റർ(ATM):
എന്നാൽ, അത്തരം വിജ്ഞാപനത്തിൽ വ്യക്തമാക്കപ്പെട്ട നിബന്ധനകൾ അനുസരിക്കുന്നപക്ഷം അത്തരം സ്വീകർത്താവിനു ഈ സെക്ഷനിലെ വ്യവസ്ഥ ബാധകമാവില്ലെന്നുള്ളതും , അല്ലെങ്കിൽ ചുരുങ്ങിയ നിരക്കിൽ ബാധകം ആവുകയുള്ളുവെന്നും റീസർവ് ബാങ്കുമായി കൂടിയാലോചിച്ചശേഷം, കേന്ദ്രസർക്കാർ ഔദ്യോഗിക ഗസറ്റിലുള്ള വിജ്ഞാപനം ഇറക്കാവുന്നതാണ്.
ആരാണ് ടിഡിഎസ് പിടിക്കേണ്ടത് ?
13. സെക്ഷൻ 194N മൂന്നേ മൂന്നു സ്ഥാപനങ്ങൾക്ക് അഥവാ എന്റിറ്റികൾക്കേ ബാധകം ആവുകയുള്ളൂ എന്നത് ശ്രദ്ധിക്കുമല്ലോ.
ആദ്യത്തേത്, എല്ലാ ബാങ്കുകളും-
സ്വകാര്യ മേഖലാ ബാങ്കുകൾ, ദേശസാൽകൃത ബാങ്കുകൾ, ഷെഡ്യൂൾഡ് ബാങ്കുകൾ, BR Act 1949 സെക്ഷൻ 51-ൽ ഉൾപ്പെടുന്ന സ്റ്റേറ്റ് ബാങ്കും പ്രാദേശിക ഗ്രാമീണ ബാങ്കുകളും അടക്കമുള്ളവ.
രണ്ടാമത് ബാങ്കിങ് വ്യവസായത്തിൽ ഏർപ്പെട്ടിരിക്കുന്ന സഹകരണ സംഘത്തിനു ബാധകമാണ്;
മൂന്നാമതായി, പോസ്റ്റ് ഓഫീസിനും ബാധകമാണ്.
ആരിൽ നിന്നാണ് ടിഡിഎസ് പിടിക്കേണ്ടത് ?
14. മേൽപ്പറഞ്ഞ മൂന്നു എന്റിറ്റികൾ, സാമ്പത്തിക വർഷത്തിൽ പണമായി കൊടുക്കൽ ഒരുകോടി കവിഞ്ഞാൽ , ഒരു കോടിക്ക് മേലെ വരുന്ന തുകയുടെ 2% ടി ഡി സ് പിടിക്കേണ്ടതാണ്. പിന്നീട് കൊടുക്കുന്ന എല്ലാ തുകക്കും ടി ഡി സ് ബാധകമാണ് .
സെക്ഷൻ വായിച്ചാൽ , എല്ലാ വ്യക്തികൾക്കും / സ്ഥാപനങ്ങൾക്കും (persons) നടത്തിയ പേമെന്റുകൾക്ക് ബാധകമാണ് എന്ന് കാണാം. അതിനാൽ ഒറ്റ നോട്ടത്തിൽ ഇത് Individuals, Partnership firms, Association of persons, Body of Individuals, companies, local authorities, trusts, LLP’s, Corporations, Artificial Juridical persons, Hindu undivided families ഇവയൊക്കെ അടങ്ങുന്ന ‘വ്യക്തികൾക്കും /സ്ഥാപനങ്ങൾക്കും’ (persons) ബാധകമാണ്.
15. പക്ഷെ, ടി.ഡി.എസിൽ നിന്നുള്ള ചില ഒഴിവിനും സെക്ഷൻ വ്യവസ്ഥ ചെയ്യുന്നുണ്ട്.
ഇത്തരത്തിൽ, താഴെപ്പറയുന്ന വ്യക്തികൾക്കോ/സ്ഥാപനങ്ങൾക്കോ എന്റിറ്റികൾക്കോ നടത്തുന്ന പേയ്മെന്റുകൾക്ക് ടി.ഡി.എസ് ആവശ്യമില്ല. ടി.ഡി.എസ് ഇല്ലാതെ പണം സ്വീകരിക്കാവുന്ന നാല് എന്റിറ്റികൾ താഴെപ്പറയുന്നവയാണ്:
1). ഗവർമെന്റിനു നടത്തുന്ന ക്യാഷ് പേയ്മെന്റുകൾക്ക് ടി.ഡി.എസ് ബാധകമല്ല.
‘ഗവർമെന്റ്’ എന്നത് Section 194N-ലോ Income Tax Act 1961-ലോ നിർവചിച്ചിട്ടില്ല.
ഇതിൽ കേന്ദ്ര ഗവർമെന്റ്,സംസ്ഥാന ഗവർമെന്റ്, കേന്ദ്രഭരണ പ്രദേശങ്ങളിലെ ഗവർമെന്റ് ഇവ തീർച്ചയായും ഉൾപ്പെടും.മേല്പറഞ്ഞവക്കു പുറമെ, ഗവർമെന്റുകൾക്കു കീഴിൽ പ്രവർത്തിക്കുന്ന വകുപ്പുകളും ഉൾപ്പെടും.
എന്നാൽ, ബിസിനസ്സും വാണിജ്യപ്രവർത്തനവും നടത്തുന്ന ഇന്ത്യൻ ഓയിൽ കോർപറേഷൻ, ബി.എസ.എൻ.എൽ, എൽ.ഐ.സി, ഷിപ്പിംഗ് കോർപറേഷൻ ഓഫ് ഇന്ത്യ തുടങ്ങിയ കമ്പനികളോ കോർപറേഷനുകളോ ഇതിൽപ്പെടില്ല. പരമാധികാരത്തോടെയുള്ള ( sovereign functions) പ്രവർത്തനം നടത്തുന്ന ഗവർമെന്റുകൾ മാത്രമേ ഈ പദപ്രയോഗത്തിൽ അടങ്ങിയിട്ടുള്ളു. അതിനാൽ ഏതൊക്കെ എന്റിറ്റികളാണ് ഗവർമെന്റി’ൽ ഉൾപ്പെടുന്നത് എന്ന് തീരുമാനിക്കേണ്ടതായിട്ടുണ്ട്.
16. ഒരു കേന്ദ്ര നിയമം എന്ന നിലക്ക്, General Clauses Act 1897-ലെ സെക്ഷൻ 3(23)-ൽ കൊടുത്തിരിക്കുന്ന “Government” എന്നതിന്റെ നിർവചനം സെക്ഷൻ 194N-നും ബാധകമാണ്. ആ നിർവചനം ഞാൻ താഴെ ഉദ്ധരിക്കുകയാണ്:
3 (23) : കേന്ദ്ര ഗവർമെന്റും സംസ്ഥാനഗവർമെന്റും അടങ്ങുന്നതാണ് ഗവർമെന്റ് (“Government”) അല്ലെങ്കിൽ ദി ഗവർമെന്റ്(“the Government”).
1897-ലെ നിയമത്തിൽ നൽകിയ നിർവചനം അതിന്റെ അർത്ഥം വിശദീകരിക്കാൻ ഒരു ശ്രമവും ഉണ്ടായില്ല; കേന്ദ്ര ഗവർമെന്റും സംസ്ഥാന ഗവർമെന്റും അടങ്ങുന്നതാണ് ഗവർമെന്റ് (“Government”) എന്ന് മാത്രമേ അതിൽ പറയുനുള്ളു.
17. V.P NAIR V KSEB AIR 1989 (KER) 86-ലെ വിധി പ്രകാരം കേരള സംസ്ഥാന വിദ്യുച്ഛക്തി ബോർഡ്, ‘ഗവർമെന്റ്’ അല്ല K.P. SINGH V FCI-ലെ വിധിയനുസരിച് ഫുഡ് കോർപറേഷൻ ഓഫ് ഇന്ത്യ ‘ഗവർമെന്റ്’ അല്ല.
ഏതെങ്കിലും ഒരു പ്രത്യേക എന്റിറ്റി ‘ഗവർമെന്റ്’ ആണോ അല്ലയോ എന്ന് തീരുമാനിക്കുവാൻ കോടതികൾ എല്ലാ വാസവും പഠിക്കേണ്ടതുണ്ട്.
തുടരും……………
SIVADAS CHETTOOR BCOM FCA LL.M
MOB : 9447137057
[email protected]
