കിക്‌മ മാനേജ്‌മെന്റ്‌ ഫെസ്റ്റ്‌ 31നും ഒന്നിനും
കേരളസഹകരണമാനേജ്‌മെന്റ്‌ ഇന്‍സ്‌റ്റിറ്റിയൂട്ട്‌ (കിക്‌മ) ജനുവരി 31നും ഫെബ്രുവരി ഒന്നിനും അവനീര്‍2കെ25 എന്ന ദേശീയമാനേജ്‌മെന്റ്‌ ഫെസ്റ്റ്‌ നടത്തും. സംസ്ഥാനസഹകരണയൂണിയന്‍ ചെയര്‍മാന്‍ കോലിയക്കോട്‌ കൃഷ്‌ണന്‍നായര്‍ ഉദ്‌ഘാടനം ചെയ്യും. ടെക്‌നോപാര്‍ക്കിലെ ടാറ്റ്‌ എല്‍എക്‌സ്സി കമ്പനിയുടെ മേധാവിയും ഡയറക്ടറുമായ വി. ശ്രീകുമാര്‍ മുഖ്യാതിഥി ആകും. മല്‍സരവിജയികള്‍ക്കു സഹകരണസംഘം രജിസ്‌ട്രാര്‍ ഡോ. സജിത്‌ ബാബു സമ്മാനം നല്‍കും. കിക്‌മ കാമ്പസില്‍ നടക്കുന്ന ഫെസ്‌റ്റില്‍ കേരള, തമിഴ്‌നാട്‌, കര്‍ണാടകം എന്നീ സംസ്‌ഥാനങ്ങളിലെ 27ലധികം കോളേജുകളില്‍നിന്നു 350ല്‍പരം വിദ്യാര്‍ഥികള്‍ പങ്കെടുക്കും. മാനേജ്‌മെന്റ്‌, മാനേജ്‌മെന്റിതരവിഭാഗങ്ങളിലായി ബിസിനസ്‌ ക്വിസ്‌, ബെസ്റ്റ്‌ മാനേജ്‌മെന്റ്‌ ടീം, ബെസ്റ്റ്‌ മാനേജര്‍, മാര്‍ക്കറ്റിങ്‌ ഗെയിം, ഫിനാന്‍ഷ്യല്‍ ഗെയിം, ട്രഷര്‍ ഹണ്ട്‌, സ്‌പോര്‍ട്ട്‌ ഡാന്‍സ്‌, സ്‌പോര്‍ട്‌്‌ ഫോട്ടോഗ്രഫി മല്‍സരങ്ങള്‍ നടക്കും. വ്യവസായമേഖലയിലെയും അക്കാദമിക്‌മേഖലയിലെയും വിദഗ്‌ധരാണ്‌ വിലയിരുത്തല്‍ നടത്തുക. ഒരുലക്ഷംരൂപയ്‌ക്കുള്ള സമ്മാനത്തുകയും പുരസ്‌കാരങ്ങളും ലഭിക്കാന്‍ അവസരമുണ്ട്‌. മാനേജ്‌മെന്റ്‌ വിദ്യാര്‍ഥികള്‍ക്കു പുറമെ, എഞ്ചിനിയറിങ്‌, ആര്‍ട്‌സ്‌, ബിരുദവിദ്യാര്‍ഥികള്‍ക്കും തിരഞ്ഞെടുക്കപ്പെട്ട മല്‍സരങ്ങളില്‍ പങ്കെടുക്കാം.
