കോവിഡ് പ്രതിരോധത്തിന് സഹകരണ ‘ആക്ഷന്‍ പ്ലാന്‍’; 110 ആശുപത്രികള്‍ സജ്ജം
കോവിഡ് പ്രതിരോധ പ്രവര്‍ത്തനത്തില്‍ സഹകരണ മേഖലയുടെ സജീവപങ്കാളിത്തം ഉറപ്പാക്കാന്‍ സഹകരണ വകുപ്പ് നിര്‍ദ്ദേശിച്ചു. ഓരോ പ്രദേശത്തിന്റെയും രോഗവ്യാപന തീവ്രത അനുസരിച്ച് പ്രതിരോധ പ്രവര്‍ത്തനത്തിന് സംഘങ്ങള്‍ക്ക് മുന്നിട്ടിറങ്ങാം. ഇതിനായി സംഘത്തിന്റെ പൊതുനന്മാ ഫണ്ട് ഉപയോഗപ്പെടുത്താം. സംസ്ഥാനത്തെ മുഴുവന്‍ സഹകരണ ആശുപത്രികളിലും കോവിഡ് ആക്ഷന്‍ പ്ലാന്‍ തയ്യാറാക്കിക്ക ഴിഞ്ഞു.
സംസ്ഥാനത്താകെ 110 സഹകരണ ആശുപത്രികളാണുള്ളത്. ഇതില്‍ 45 സഹകരണ ആശുപത്രികളില്‍ ഓക്സിജന്‍ ബഡ്ഡുകളും ഐ.സി.യു. സൗകര്യവും കോവിഡ് രോഗികള്‍ക്കായി നീക്കിവെച്ചിട്ടുണ്ട്. ഇവയ്ക്ക് കുറഞ്ഞ നിരക്ക് മാത്രമേ ഈടാക്കാവൂവെന്നാണ് സഹകരണ സംഘം രജിസ്ട്രാര്‍ നല്‍കിയ നിര്‍ദ്ദേശം. കിടത്തിച്ചികിത്സ ഇല്ലാത്ത ആശുപത്രികളാണ് ബാക്കിയുള്ളവ. ഇവയെല്ലാം കോവിഡ് പ്രാഥമിക ചികിത്സാ കേന്ദ്രങ്ങളാണ്. എല്ലായിടത്തും ടെലി മെഡിസിന്‍ സൗകര്യമുണ്ട്.
തദ്ദേശ സ്ഥാപനങ്ങള്‍, ആരോഗ്യവകുപ്പ്, ദുരന്തനിവാരണ അതോറിറ്റി എന്നിവയുടെ നിര്‍ദ്ദേശമനുസരിച്ച് സഹകരണ ആശുപത്രികള്‍ പ്രവര്‍ത്തിക്കണം. ആരോഗ്യവകുപ്പ് ഉദ്യോഗസ്ഥര്‍ നിര്‍ദ്ദേശിക്കുന്നതിനനുസരിച്ച് കോവിഡ് രോഗികള്‍ക്ക് സൗകര്യമൊരുക്കണമെന്നും രജിസ്ട്രാര്‍ നിര്‍ദ്ദേശം നല്‍കിയിട്ടുണ്ട്. നീതി സ്റ്റോറുകള്‍ വഴി അവശ്യമരുന്ന് അടക്കം 13 ശതമാനം വരെ വിലക്കുറവില്‍ ലഭ്യമാക്കുന്നുണ്ട്.
സഹകരണ നീതി മെഡിക്കല്‍ സ്റ്റോര്‍, ആശുപത്രികള്‍, ലാബുകള്‍ എന്നിവക്ക് പൊതുജനങ്ങളുടെ സൗകര്യത്തിനനുസരിച്ച് പ്രവര്‍ത്തനത്തില്‍ മാറ്റം വരുത്താമെന്നും രജിസ്ട്രാര്‍ നിര്‍ദ്ദേശിച്ചിട്ടുണ്ട്. നെബൂലൈസര്‍, പള്‍സ് ഓക്സി മീറ്റര്‍ തുടങ്ങിയവയും കുറഞ്ഞ വിലയ്ക്ക് ലഭ്യമാണ്. സഹകരണ സംഘങ്ങള്‍ മാസ്‌ക്, സാനിറ്റൈസര്‍ നിര്‍മ്മാണത്തിലും സജീവമാണ്. ആംബുലന്‍സുകളും കോവിഡ് പ്രതിരോധത്തിന് ഉപയോഗിക്കുന്നു.
തദ്ദേശ സ്വയംഭരണ സ്ഥാപനങ്ങളുമായി സഹകരിച്ച് ആവശ്യമുള്ള സ്ഥലങ്ങളില്‍ ആംബുലന്‍സ് സര്‍വീസുകള്‍, ഹെല്‍പ് ഡെസ്‌ക്, ലാബുകളുടെ സേവനം, മരുന്നുകള്‍ എന്നിവ നല്‍കുന്നതിനായി സഹകരണ സംഘങ്ങള്‍ക്ക് പൊതുനന്മാ ഫണ്ടില്‍ നിന്ന് പണം നല്‍കാമെന്നാണ് നിര്‍ദ്ദേശം. അതത് സഹകരണ സ്ഥാപനങ്ങളുടെ സാമ്പത്തിക ശേഷിക്കനുസരിച്ച് ഭരണസമിതി തീരുമാനത്തിന് വിധേയമായിട്ടായിരിക്കണം പൊതുനന്മാ ഫണ്ടില്‍നിന്ന് തുക ചെലവഴിക്കേണ്ടത്. കമ്മ്യൂണിറ്റി കിച്ചന്‍ തുടങ്ങുന്നതിനും സഹകരണ സംഘങ്ങള്‍ക്കു പൊതുനന്മാ ഫണ്ട് ഉപയോഗിക്കാം.
