സഹകരണ ലോകത്തിനു വെളിച്ചമായി ഐ.സി.എ.
(2020 ജൂലായ് ലക്കം)
പി.വി. രാജേഷ് , കരിപ്പാല്‍
( പ്രിന്‍സിപ്പല്‍, സഹകരണ പരിശീലന കോളേജ് )
തുടക്കം 1895 ല്‍. അംഗങ്ങളായി 109 രാജ്യങ്ങള്‍. 313 സഹകരണ ഫെഡറേഷനുകള്‍. രണ്ടു ലോക യുദ്ധങ്ങളെ ഈ സംഘടന അതിജീവിച്ചു. രാഷ്ട്രീയ നിഷ്പക്ഷത നിലനിര്‍ത്തിപ്പോരുന്നതുകൊണ്ട് ഈ 125 ാം വയസ്സിലും അന്താരാഷ്ട്ര സഹകരണ സഖ്യം ( ഐ.സി.എ. ) ഊര്‍ജസ്വലതയോടെ സഹകരണ മേഖലയ്ക്ക് വെളിച്ചം പകര്‍ന്നുകൊണ്ടിരിക്കുന്നു.
സ ഹകരണ സംഘടനകളുടെ ആഗോളതല കോണ്‍ഫെഡറേഷനായ അന്താരാഷ്ട്ര സഹകരണ സഖ്യം ( ഐ.സി.എ – ഇന്റര്‍നാഷണല്‍ കോ-ഓപ്പറേറ്റീവ് അലയന്‍സ്) ലോകമെങ്ങുമുള്ള സഹകരണ പ്രസ്ഥാനത്തെ പ്രതിനിധാനം ചെയ്യുന്ന സര്‍ക്കാരിതര സഹകരണ ഫെഡറേഷനാണ്. 109 രാജ്യങ്ങളില്‍ നിന്നായി 313 സഹകരണ ഫെഡറേഷനുകളും സഹകരണ സംഘങ്ങളും 125 ാം വയസ്സിലെത്തിയ ഐ.സി.എ. യില്‍ അംഗങ്ങളാണ്.
സഹകരണ സംഘങ്ങളുടെ പ്രവര്‍ത്തനം പ്രോത്സാഹിപ്പിക്കാനായി ലാഭേച്ഛയില്ലാതെ പ്രവര്‍ത്തിക്കുന്ന അന്താരാഷ്ട്ര സഖ്യമാണ് ഐ.സി.എ. 1895 ആഗസ്റ്റ് 19ന് ഇംഗ്ലണ്ടിലെ ലണ്ടനിലായിരുന്നു രൂപവത്കരണം. അര്‍ജന്റിന, ഓസ്ട്രേലിയ, ബെല്‍ജിയം, ഇംഗ്ലണ്ട്, ഡെന്‍മാര്‍ക്ക്, ഫ്രാന്‍സ്, ജര്‍മനി, ഹോളണ്ട്, ഇന്ത്യ, ഇറ്റലി, സ്വിറ്റ്‌സര്‍ലന്‍ഡ്, സെര്‍ബിയ, യു.എസ.്എ. എന്നീ രാജ്യങ്ങളില്‍ നിന്നുള്ള സഹകരണ സംഘങ്ങളുടെ പ്രതിനിധികള്‍ പങ്കെടുത്ത ആദ്യത്തെ അന്താരാഷ്ട്ര സഹകരണ കോണ്‍ഗ്രസ്സിലാണ് അന്താരാഷ്ട്ര സഹകരണ സഖ്യം രൂപം കൊണ്ടത്. ലണ്ടന്‍ ആസ്ഥാനമായി പ്രവര്‍ത്തിച്ചിരുന്ന ഐ.സി.എ. 1982 ല്‍ ആസ്ഥാനം സ്വിറ്റ്‌സര്‍ലന്‍ഡിലെ ജനീവയിലേക്ക് മാറ്റി. 2013 മുതല്‍ ബെല്‍ജിയത്തിലെ ബ്രസ്സല്‍സ് ആണ് ആസ്ഥാനം.
കൃഷി, ബാങ്കിങ്, മീന്‍പിടിത്തം, ആരോഗ്യം, പാര്‍പ്പിടം, ഇന്‍ഷുറന്‍സ്, വ്യവസായം, സേവനം, ഉപഭോക്തൃ സേവനം തുടങ്ങി സമ്പദ് വ്യവസ്ഥയുടെ എല്ലാ മേഖലകളില്‍ നിന്നുമുള്ള അന്താരാഷ്ട്ര-ദേശീയ സഹകരണ സംഘങ്ങളാണ് സാധാരണയായി ഐ.സി.എ. യില്‍ അംഗങ്ങളായി വരുന്നത്. ഏകദേശം മുപ്പതു ലക്ഷം സഹകരണ സംഘങ്ങളെ പ്രതിനിധാനം ചെയ്യുന്നു ഈ പരമോന്നത സംഘടന.
സഹകരണ തത്വങ്ങളെ നിര്‍വചിക്കുകയും നിലനിര്‍ത്തുകയും ചെയ്യുക, വിവരങ്ങള്‍ നല്‍കുക, അന്താരാഷ്ട്ര വ്യാപാരം വികസിപ്പിക്കുക തുടങ്ങിയ ലക്ഷ്യങ്ങളോടെയാണ് ഐ.സി.എ. രൂപവത്കരിച്ചത്. രണ്ടു ലോകയുദ്ധങ്ങളെ അതിജിവിച്ച അന്താരാഷ്ട്ര സംഘടനകളില്‍ ഒന്നാണിത്. ഐ.സി.എ. യിലെ അംഗങ്ങള്‍ തമ്മിലുള്ള രാഷ്ട്രീയ വ്യത്യാസങ്ങളെ മറികടക്കുക എന്നത് വളരെ പ്രയാസകരമായിരുന്നു. എങ്കിലും, സമാധാനത്തിനും ജനാധിപത്യത്തിനും പ്രതിജ്ഞാബദ്ധരായി ഒത്തൊരുമിച്ചു നിന്നതിലൂടെയും തുടക്കം മുതലുള്ള രാഷ്ട്രീയ നിഷ്പക്ഷത നിലനിര്‍ത്തിപ്പോന്നതിലൂടെയും ഐ.സി.എ. എല്ലാ തടസ്സങ്ങളേയും അതിജീവിച്ചു.
സഹകരണ സംഘങ്ങള്‍ രൂപവത്കരിക്കാനും അതിന്റെ വളര്‍ച്ചക്കുതകുന്ന അന്തരീക്ഷം സാധ്യമാക്കുന്നതിനുമായി ആഗോള , പ്രാദേശിക സര്‍ക്കാരുകളുമായും സംഘടനകളുമായും ഒത്തുചേര്‍ന്നുകൊണ്ട് ഐ.സി.എ. നിയമനിര്‍മാണങ്ങള്‍ നടപ്പാക്കുന്നു. ആഗോള സഹകരണ പ്രസ്ഥാനങ്ങളുടെ ഉന്നമനത്തിനായി അറിവ്, വൈദഗ്ധ്യം, ഏകോപിതമായ പ്രവര്‍ത്തങ്ങള്‍ തുടങ്ങിയവക്ക് ഐ.സി.എ. ഫലപ്രദവും കാര്യക്ഷമവുമായ ആഗോള ശബ്ദവും രൂപവും നല്‍കിവരുന്നു.
അംഗങ്ങള്‍ ജനാധിപത്യപരമായി ഭരിക്കുന്ന ഒരു വികേന്ദ്രീകൃത സംഘടനയാണ് ഐ.സി.എ. ജനറല്‍ അസംബ്ലി, അഡ്മിനിസ്‌ട്രേറ്റീവ് കൌണ്‍സില്‍ ബോര്‍ഡ്, റീജിയണല്‍ അസംബ്ലികള്‍, മേഖലാ തലത്തില്‍ തിരഞ്ഞെടുക്കപ്പെടുന്ന സമിതികള്‍, ഓഡിറ്റിനും നിയന്ത്രണത്തിനുമുള്ള സമിതി എന്നിവ അടങ്ങുന്നതാണ് സഖ്യത്തിന്റെ ഘടന. രണ്ട് വര്‍ഷത്തിലൊരിക്കല്‍ എല്ലാ അംഗസംഘടനകളുടെയും പ്രതിനിധികളെ ഒരുമിച്ചുകൊണ്ടുവരുന്ന ഐ.സി.എ.യുടെ ഏറ്റവും ഉയര്‍ന്ന നയരൂപവത്കരണ സമിതിയാണ് ജനറല്‍ അസംബ്ലി. ഐ.സി.എ. യുടെ പ്രവര്‍ത്തന പദ്ധതികളും ബജറ്റും അംഗീകരിക്കുന്നതും പ്രസിഡന്റ്, ബോര്‍ഡ് അംഗങ്ങള്‍, ഓഡിറ്റ് – കണ്‍ട്രോള്‍ കമ്മിറ്റി അംഗങ്ങള്‍ എന്നിവരെ തിരഞ്ഞെടുക്കുന്നതും ജനറല്‍ അസംബ്ലിയിലാണ്. പ്രസിഡന്റും നാലു വൈസ് പ്രസിഡന്റുമാരും മറ്റു പതിനഞ്ച് അംഗങ്ങളുമടങ്ങുന്ന ഭരണ നിര്‍വഹണ സമിതിയാണ് ഐ.സി.എ. യുടെ പ്രവര്‍ത്തനത്തിന് മേല്‍നോട്ടം വഹിക്കുന്നതും ആഗോള തന്ത്രങ്ങള്‍ വികസിപ്പിക്കുന്നതും. അംഗസംഘടനകളുടെ പ്രവര്‍ത്തനങ്ങള്‍ നിലീക്ഷിക്കുന്നതും ഈ നിര്‍വഹണ സമിതിയാണ്.
നാലു മേഖലാ സമിതികള്‍
ആഫ്രിക്ക, അമേരിക്ക, ഏഷ്യ -പെസഫിക്, യൂറോപ്പ് എന്നിങ്ങനെ നാലു പ്രാദേശിക തലങ്ങളെ പ്രതിനിധാനം ചെയ്യുന്ന നാലു റീജിയണല്‍ അസംബ്ലികള്‍ ഐ.സി.എ. ക്കുണ്ട്. ജനറല്‍ അസംബ്ലിയുടെ തീരുമാനങ്ങള്‍ പ്രാദേശിക തലങ്ങളില്‍ നടപ്പാക്കുക എന്നതാണ് റീജിയണല്‍ അസംബ്ലികളുടെ ലക്ഷ്യം. റീജിയണല്‍ അസംബ്ലിയില്‍ നിന്നു ഓരോ പ്രദേശത്തിനും ഒരു പ്രസിഡന്റ്, വൈസ് പ്രസിഡന്റ്, മറ്റു അംഗങ്ങള്‍ എന്നിവരുള്‍പ്പെടുന്ന സമിതികളുണ്ടാക്കുന്നു. നാലു വര്‍ഷമാണ് ഈ സമിതികളുടെ കാലാവധി. ഓരോ മേഖലയിലും ഓരോ പേരിലാണ് ഇവ അറിയപ്പെടുന്നത്. ആഫ്രിക്കയില്‍ എക്‌സിക്യൂട്ടിവ് കമ്മിറ്റി എന്നും അമേരിക്കയില്‍ കോമിറ്റ് എജെക്റ്റിവോ എന്നും ഇതറിയപ്പെടുന്നു. ഏഷ്യ-പെസഫികില്‍ ഇത് സ്റ്റാന്‍ഡിങ്ങ് കമ്മിറ്റിയാണ്. യൂറോപ്പിലാവട്ടെ യൂറോപ്യന്‍ കൗണ്‍സിലും.
ഓഡിറ്റ് – നിയന്ത്രണ സമിതിയുടെ പ്രധാന പ്രവര്‍ത്തനങ്ങളിലൊന്ന് ഐ.സി.എ. യുടെ സാമ്പത്തിക സ്ഥിതി നിരീക്ഷിക്കുക എന്നതാണ്. കാര്യക്ഷമമായ മാനേജ്‌മെന്റിനും പ്രവര്‍ത്തനങ്ങള്‍ക്കും പ്രധാനമെന്നു തോന്നുന്ന പ്രശ്‌നങ്ങളെക്കുറിച്ച് ബോര്‍ഡിനും ജനറല്‍ അസംബ്ലിക്കും റിപ്പോര്‍ട്ടുകള്‍ സമര്‍പ്പിക്കുന്നതും ഈ സമിതിയാണ്. ഇവയ്ക്കു പുറമെ, പ്രത്യേക മേഖലകളില്‍, അതായത് ഭവന, കാര്‍ഷിക, ആരോഗ്യ, ഉപഭോക്തൃ, ബാങ്കിങ്് മേഖലകളില്‍, താല്‍പര്യമുള്ള അംഗസംഘടനകളെ പുനഃക്രമീകരിക്കുന്ന പ്രത്യേക മേഖലാ സംഘടനകളും ( സെക്ടറല്‍ ബോര്‍ഡ് ) ഐ.സി.എ. ക്കുണ്ട്. ഇന്റര്‍നാഷണല്‍ കോ-ഓപ്പറേറ്റീവ് അഗ്രിക്കള്‍ച്ചര്‍ ഓര്‍ഗനൈസേഷന്‍, ഇന്റര്‍നാഷണല്‍ കോ-ഓപ്പറേറ്റീവ് ബാങ്കിങ് അസോസിയേഷന്‍, കണ്‍സ്യൂമര്‍ കോ -ഓപ്പറേറ്റീവ് വേള്‍ഡ് വൈഡ്, ഇന്റര്‍നാഷണല്‍ കോ-ഓപ്പറേറ്റീവ് ഫിഷറീസ് ഓര്‍ഗനൈസേഷന്‍, ഇന്റര്‍നാഷണല്‍ ഹെല്‍ത്ത് കോ-ഓപ്പറേറ്റീവ് ഓര്‍ഗനൈസേഷന്‍, ഭവന നിര്‍മാണ സഹകരണ സംഘങ്ങള്‍ക്കായുള്ള ഗ്ലോബല്‍ ഓര്‍ഗനൈസേഷന്‍, ഇന്റര്‍നാഷണല്‍ കോ-ഓപ്പറേറ്റീവ് ആന്‍ഡ് മ്യൂച്ച്വല്‍ ഇന്‍ഷുറന്‍സ് ഫെഡറേഷന്‍, ഇന്റര്‍നാഷണല്‍ ഓര്‍ഗനൈസേഷന്‍ ഓഫ് ഇന്‍ഡസ്ട്രിയല്‍, ആര്‍ട്ടിസനല്‍ ആന്‍ഡ് സര്‍വീസ് പ്രൊഡ്യൂസേഴ്‌സ് കോ-ഓപ്പറേറ്റീവ്‌സ് എന്നിവയാണിവ. കൂടാതെ, സഹകരണരംഗത്തെ ഗവേഷണം, ആശയവിനിമയം, മാനവവിഭവശേഷി വികസനം, ലിംഗസമത്വം എന്നിവയില്‍ ശ്രദ്ധ കേന്ദ്രീകരിക്കാന്‍ അംഗങ്ങളെ പ്രാപ്തരാക്കുന്ന അഞ്ചു തീമാറ്റിക് കമ്മിറ്റികളും ഐ.സി.എ.ക്കുണ്ട്. 1946 ല്‍ ഐക്യരാഷ്ട്രസഭയുടെ കണ്‍സള്‍ട്ടേറ്റീവ് സ്റ്റാറ്റസ് ലഭിച്ച ആദ്യത്തെ സര്‍ക്കാരിതര സംഘടനയാണ് ഐ.സി.എ.
സഹകരണദിനം
എല്ലാ വര്‍ഷവും ജൂലായിലെ ആദ്യത്തെ ശനിയാഴ്ച ലോകമെമ്പാടുമുള്ള സഹകാരികള്‍ അന്താരാഷ്ട്ര സഹകരണ ദിനമായി ആഘോഷിക്കുന്നു. സഹകരണ പ്രസ്ഥാനത്തിന്റെ വാര്‍ഷികാഘോഷമാണിത്. 1928 ജൂലായ് ഏഴിനാണ് അന്താരാഷ്ട്ര സഹകരണ സഖ്യം ആദ്യമായി സഹകരണ ദിനം ആഘോഷിച്ചത്. 1992 ഡിസംബര്‍ 16ന് ഐക്യരാഷ്ട്രസഭയാണ് ഐ.സി.എ. യുടെ നൂറാം വാര്‍ഷിക ദിനമായ 1995 ജൂലായിലെ ആദ്യ ശനിയാഴ്ച അന്താരാഷ്ട്ര സഹകരണ ദിനമായി പ്രഖ്യാപിച്ചത്. സാമ്പത്തിക, സാമൂഹിക, സാംസ്‌കാരിക വികസനത്തില്‍ സഹകരണ പ്രസ്ഥാനത്തിന് ഒരു പ്രധാന പങ്കുണ്ടെന്ന് തിരിച്ചറിഞ്ഞ ഐക്യരാഷ്ട്ര സഭ 1995ല്‍ അന്താരാഷ്ട്ര സഹകരണ ദിനം ആഘോഷിച്ചു. 1995 മുതല്‍ ഐക്യരാഷ്ട്ര സഭയും ഐ.സി.എ. യും സംയുക്തമായാണ് സഹകരണ ദിനം ആഘോഷിക്കുന്നത്. സഹകരണത്തെയും സഹകരണ സ്ഥാപനങ്ങളെയും അവയുടെ പ്രവര്‍ത്തനങ്ങളെയും കുറിച്ച് അവബോധം വര്‍ധിപ്പിക്കുക, അന്താരാഷ്ട്ര ഐക്യദാര്‍ഢ്യം, സാമ്പത്തിക കാര്യക്ഷമത, സമത്വം, ലോകസമാധാനം മുതലായ വിഷയങ്ങളില്‍ പ്രസ്ഥാനത്തിന്റെ വിജയങ്ങളും ആശയങ്ങളും ആശങ്കകളും പരസ്പരം പങ്കുവെക്കുകയും പ്രോത്സാഹി പ്പിക്കുകയും ചെയ്യുക എന്നതാണ് ഈ ആഘോഷങ്ങള്‍ കൊണ്ട് ലക്ഷ്യമിടുന്നത്. പ്രാദേശിക, ദേശീയ, അന്തര്‍ദേശീയ തലങ്ങളില്‍ അന്താരാഷ്ട്ര സഹകരണ പ്രസ്ഥാനവും സര്‍ക്കാരുകള്‍ ഉള്‍പ്പടെയുള്ള മറ്റു സഹകരണ സ്ഥാപനങ്ങളും തമ്മിലുള്ള പങ്കാളിത്തം ശക്തിപ്പെടുത്താനും വ്യാപിപ്പിക്കാനും ഈ ദിനം ഉപയോഗപ്പെടുത്തുന്നു. ലോകമെങ്ങുമുള്ള സഹകാരികള്‍, സഹകരണ സ്ഥാപനങ്ങള്‍, സഹകരണ വിദ്യാഭ്യാസ സ്ഥാപനങ്ങള്‍ എന്നിവയെല്ലാം ഈ ദിനം പലവിധത്തില്‍ ആഘോഷിക്കുന്നു. അന്നേ ദിവസം എല്ലാ സഹകരണ ആസ്ഥാനങ്ങളിലും സഹകരണ പതാക ഉയര്‍ത്തുകയും സഹകരണ പ്രതിജ്ഞ ചൊല്ലുകയും ചെയ്തുകൊണ്ടാണ് ആഘോഷ പരിപാടികള്‍ക്കു തുടക്കം കുറിക്കുന്നത്. സാമ്പത്തിക, സാമൂഹിക, പാരിസ്ഥിതിക, ആരോഗ്യ മേഖലകളെ അടിസ്ഥാനമാക്കി പ്രബന്ധാവതരണം, സെമിനാറുകള്‍, ചര്‍ച്ചാക്ലാസുകള്‍, വര്‍ക്ക്ഷോപ്പുകള്‍ തുടങ്ങിയവ സംഘടിപ്പിച്ചു സഹകാരികളെ ബോധവല്‍ക്കരിക്കുന്നു. കൂടാതെ, സഹകരണ മേളകള്‍, പ്രദര്‍ശനങ്ങള്‍, മത്സരങ്ങള്‍, പ്രചരണ പരിപാടികള്‍ എന്നിവയും സംഘടിപ്പിക്കുന്നു.
മഴവില്‍ പതാക
1921ല്‍ ഫ്രഞ്ച് സാമ്പത്തിക ശാസ്ത്രജ്ഞനായ ചാള്‍സ് ഗൈഡാണ് റെയിന്‍ബോ ഫ്‌ളാഗ് എന്നറിയപ്പെടുന്ന സഹകരണ പതാകക്ക് രൂപം കൊടുത്തത്. 1923 ല്‍ ആദ്യത്തെ അന്താരാഷ്ട്ര സഹകരണ ദിനാഘോഷത്തില്‍ ഈ പതാകയാണ് ഉയര്‍ത്തിയത്. 1925 ല്‍ മഴവില്‍ പതാകയെ ഐ.സി.എ.യുടെ ഓദ്യോഗിക പതാകയായി സ്വീകരിക്കുകയും ചെയ്തു. സഹകരണ പതാക വൈവിധ്യത്തിലെ ഐക്യത്തെ സൂചിപ്പിക്കുന്നു. മഴവില്ലിലെ ഏഴു നിറങ്ങള്‍ പോലെ ഈ പതാക സമാധാനത്തിന്റെയും പ്രതീക്ഷയുടെയും പ്രത്യാശയുടെയും പ്രകാശത്തിന്റെയും ശക്തിയുടെയും പ്രബുദ്ധതയുടെയും പുരോഗതിയുടെയും പ്രതീകമാണ്. ലോകമെമ്പാടുമുള്ള സഹകാരികള്‍ സഹകരണ പ്രസ്ഥാനത്തിന്റെ ഓരോ ആഘോഷവേളയിലും സഹകരണ പതാക ഉയര്‍ത്തിക്കൊണ്ടാണ് പരിപാടികള്‍ക്ക് തുടക്കം കുറിക്കുന്നത്. വിവിധ രാജ്യങ്ങളിലെ പല സ്ഥാപനങ്ങളുടെയും പതാകയുമായി സഹകരണ മഴവില്‍ പതാകയ്ക്ക് സാമ്യമുള്ളതിനാല്‍ 2001ല്‍ തെക്കന്‍ കൊറിയയിലെ സിയോളില്‍ നടന്ന ഐ.സി.എ. പൊതുസമ്മേളനത്തില്‍ ഒരു പുതിയ പതാകക്ക് അംഗീകാരം നല്‍കി. വെളുത്ത പശ്ചാത്തലത്തില്‍ ഒരു മഴവില്ലിന്റെ നാലിലൊന്നു ചിത്രീകരിച്ച് അതില്‍ നിന്ന് സമാധാനത്തിന്റെ പ്രതീകമായ വെള്ള പ്രാവുകള്‍ പറന്നുയരുന്നതായിട്ടാണ് പുതിയ പതാകയില്‍ ചിത്രീകരിച്ചിട്ടുള്ളത്സാര്‍വത്രിക സമാധാനം, സാമൂഹിക നീതി, ഐക്യദാര്‍ഢ്യം, വൈവിധ്യമാര്‍ന്ന അംഗത്വം എന്നിവയെ ഈ പതാക പ്രതിനിധാനം ചെയ്യുന്നു.
പ്രവര്‍ത്തന ദൗത്യം
വ്യക്തികള്‍ക്കും സമൂഹത്തിനും സ്വയംസഹായത്തിനും പരസ്പര സഹായത്തിനുമുള്ള ഉപാധിയായി സഹകരണത്തെ ഉപയോഗിക്കുകയും സഹകരണ വിദ്യാഭ്യാസത്തിലൂടെയും പരിശീലനത്തിലൂടെയും ലോകത്തെ മുഴുവനും സ്വാധീനിക്കുകയും ചെയ്യുക എന്ന ലക്ഷ്യമാണ് ഐ.സി. എ. യ്ക്കുള്ളത്. സഹകരണ സംഘങ്ങളുടെ താല്‍പര്യങ്ങളിലും വിജയങ്ങളിലും പിന്തുണയ്ക്കുകയും അതിനായി മികച്ച അറിവുകളും രീതികളും പകര്‍ന്നു നല്‍കുകയും സംഘങ്ങളുടെ ശേഷി വര്‍ദ്ധിപ്പിച്ച് കാലക്രമേണ അവയുടെ പ്രവര്‍ത്തനവും പുരോഗതിയും നിരീക്ഷിക്കുകയും ചെയ്യുക എന്നത് ഐ.സി.എ. യുടെ പ്രവര്‍ത്തന ദൗത്യത്തില്‍ ഉള്‍പ്പെടുന്നു. മനുഷ്യന്റെ സുസ്ഥിര വികസനം പ്രോത്സാഹിപ്പിക്കുന്നതിനും വ്യക്തിയുടെ സാമ്പത്തിക, സാമൂഹിക പുരോഗതി ഉറപ്പാക്കുന്നതിനും ഐ.സി.എ. ലക്ഷ്യം വയ്ക്കുന്നു. സഹകരണത്തെക്കുറിച്ച് സംഘടന അവബോധം വളര്‍ത്തുന്നു. സ്ഥാപനങ്ങളുടെ സഹകരണ മാതൃക മനസ്സിലാക്കാന്‍ വ്യക്തികളെയും സര്‍ക്കാര്‍ അധികാരികളെയും പ്രാദേശിക, അന്താരാഷ്ട്ര സ്ഥാപനങ്ങളെയും സഹായിക്കുന്നു. സഹകരണ സ്ഥാപനങ്ങള്‍ക്ക് വളരാനും അഭിവൃദ്ധി പ്രാപിക്കാനും ശരിയായ അന്തരീക്ഷം ഐ.സി.എ. ഉറപ്പുവരുത്തുന്നു. പുതിയ നിയമ നിര്‍മാണത്തിനും സഹകരണ മാതൃകയെയും അതിന്റെ തത്വങ്ങളെയും മൂല്യങ്ങളെയും ബഹുമാനിക്കുന്ന കൂടുതല്‍ ഉചിതമായ ഭരണപരമായ നടപടിക്രമങ്ങള്‍ക്കും അംഗങ്ങളെ സഹായിക്കുന്നു. കൂടാതെ, രാഷ്ട്രീയ പിന്തുണയും സാങ്കേതിക വൈദഗ്ധ്യവും നല്‍കിക്കൊണ്ട് അംഗസംഘങ്ങളെ ആഗോളതലത്തില്‍ അതിജീവിക്കാനും സഹായിക്കുന്നു. സഹകരണ സംഘങ്ങളെ ബാധിക്കുന്ന പ്രധാന പ്രശ്‌നങ്ങള്‍ പരിഹരിക്കുന്നതിനായി ഐ.സി.എ. യോഗങ്ങളും ശില്‍പശാലകളും സംഘടിപ്പിക്കുകയും ലോകമെമ്പാടുമുള്ള സഹകരണ സംഘങ്ങള്‍ക്കിടയില്‍ ചര്‍ച്ചകള്‍ക്ക് സാകര്യമൊരുക്കുകയും ചെയ്യുന്നു. സംഘങ്ങളുടെ ശേഷി വര്‍ദ്ധിപ്പിച്ചും സാമ്പത്തിക സഹായം നല്‍കിയും തൊഴിലവസരങ്ങള്‍ സൃഷ്ടിക്കാനും അതുവഴി ലോകത്ത് ദാരിദ്ര്യം കുറച്ചുകൊണ്ടുവരാനും ഐ.സി.എ. ശ്രമിക്കുന്നു. ലോകത്തെ സഹകരണ മുന്നേറ്റങ്ങളുടെ ശബ്ദമാണ് ഈ സഖ്യം. ലോകമെങ്ങുമുള്ള സഹകരണ സംഘങ്ങളെ ഏകോപിപ്പിച്ചുകൊണ്ട് സഹകരണ മൂല്യങ്ങളുടെയും തത്വങ്ങളുടെയും സൂക്ഷിപ്പുകാരനായി അന്താരാഷ്ട്ര സഹകരണ സഖ്യം വര്‍ത്തിക്കുന്നു.
19 പ്രസിഡന്റുമാര്‍
ഒന്നേ കാല്‍ നൂറ്റാണ്ടു പിന്നിട്ട ഈ സംഘടനയ്ക്ക് ഇതുവരെ ഉണ്ടായത് 19 പ്രസിഡന്റുമാര്‍. സംഘടന രൂപം കൊണ്ട 1895 ല്‍ രണ്ടു പ്രസിഡന്റുമാര്‍ ചേര്‍ന്നാണ് നയിച്ചത്. ഏള്‍ ഗ്രേയും ഹെന്റി ഡബ്്‌ള്യൂ വൂള്‍ഫും. പിന്നീട് 1907 ലും രണ്ടു പ്രസിഡന്റുമാരുണ്ടായി. അന്നും ഏള്‍ ഗ്രേ പ്രസിഡന്റായി തുടര്‍ന്നിരുന്നു. ഒപ്പം വില്യം മാക്‌വെലും പ്രസിഡന്റായി പ്രവര്‍ത്തിച്ചു. സംഘടനയ്ക്കാകെ അഞ്ചു സെക്രട്ടറിമാരേ ഉണ്ടായിട്ടുള്ളു. 1963 ല്‍ ഈ തസ്തിക നിര്‍ത്തലാക്കി.
രണ്ടു പതിറ്റാണ്ടിന്റെ പരിചയവുമായി ഏരിയല്‍ ഗുവാര്‍കോ
അര്‍ജന്റീനക്കാരനായ ഏരിയല്‍ ഗുവാര്‍കോ ആണ് ഇപ്പോള്‍ അന്താരാഷ്ട്ര സഹകരണ സഖ്യത്തെ നയിക്കുന്നത്. 2017 ല്‍ മലേഷ്യയിലെ കോലാലമ്പൂരില്‍ ചേര്‍ന്ന ജനറല്‍ അസംബ്ലിയിലായിരുന്നു തിരഞ്ഞെടുപ്പ്. തന്റെ രാജ്യത്ത് ശക്തമായ സഹകരണ പ്രസ്ഥാനത്തിന് നേതൃത്വം നല്‍കിയിട്ടുള്ള ഏരിയല്‍ അമേരിക്കന്‍ ഭൂഖണ്ഡത്തിലും ലോകമെങ്ങുമുള്ള സഹകരണ പ്രസ്ഥാനങ്ങളുമായി സൗഹൃദം പുലര്‍ത്തുന്നയാളാണ്. ഇരുപത് വര്‍ഷമായി സഹകരണ രംഗത്ത് നിലയുറപ്പിച്ചിട്ട്.
2001 മുതല്‍ അര്‍ജന്റീനയിലെ സഹകരണ സ്ഥാപനങ്ങളുടെ കോണ്‍ഫെഡറേഷനായ കോ-ഓപ്പറാറിന്റെ പ്രസിഡന്റാണ് ഏരിയല്‍. 2013 മുതല്‍ ഐ.സി.എ. യുടെ ബോര്‍ഡംഗവുമാണ്. 74 സഹകരണ ഫെഡറേഷനുകളും 5000 സഹകരണ സംഘങ്ങളുമുള്ള കോ-ഓപ്പറാറില്‍ ഒരു കോടി അംഗങ്ങളുണ്ട്. ‘ അര്‍ജന്റീനയിലെ സഹകരണ പ്രസ്ഥാനം : ഭാവിയിലേക്ക് പ്രതീക്ഷയോടെ ഒരു നോട്ടം ‘ എന്ന ഗ്രന്ഥത്തിന്റെ കര്‍ത്താവാണ് ഏരിയല്‍.
[mbzshare]
